ہلال بن یساف بیان کرتے ہیں: میں سالم بن عبید رضی اللہ عنہ کے ہمراہ ایک جنگ میں شریک ہوا، حاضرین میں ایک صاحب کو چھینک آ گئی تو انہوں نے کہا: «السَّلَامُ عَلَيْكُمْ» (تم پر سلامتی ہو)، تو سالم رضی اللہ عنہ نے کہا: ”تم پر بھی سلام ہو اور تمہاری والدہ پر بھی سلام ہو“، اس آدمی کو یہ بات بہت بری لگی۔ سالم رضی اللہ عنہ نے اس سے کہا: ”تمہیں شاید یہ بات بری لگی ہے؟“ وہ بولا: مجھے یہ بات پسند نہیں ہے کہ میری والدہ کا تذکرہ کیا جائے، خواہ بھلائی کے ساتھ کیا جائے یا برائی کے ساتھ۔ سالم رضی اللہ عنہ نے کہا: ہم نبی اکرم صلی اللہ علیہ وسلم کے ساتھ ایک سفر میں شریک تھے کہ ایک صاحب کو چھینک آ گئی تو انہوں نے «السَّلَامُ عَلَيْكُمْ» کہا، تو نبی اکرم صلی اللہ علیہ وسلم نے فرمایا: ” «عَلَيْكَ وَعَلَى أُمِّكَ؟» (تم پر اور تمہاری والدہ پر؟) جب کسی شخص کو چھینک آئے تو اسے «الْحَمْدُ لِلّٰهِ عَلَى كُلِّ حَالٍ» ”ہر حال میں اللہ کے لیے تمام تعریفیں ہیں“ کہنا چاہیے یا «الْحَمْدُ لِلّٰهِ رَبِّ الْعَالَمِينَ» ”تمام تعریفیں اللہ کے لیے ہیں جو تمام جہانوں کا رب ہے“ کہنا چاہیے اور دوسرا شخص اس کے جواب میں «يَرْحَمُكَ اللّٰهُ» ”اللہ تم پر رحم فرمائے“ کہے اور وہ شخص اسے یہ کہے: «يَغْفِرُ اللّٰهُ لَكُمْ» ”اللہ تعالیٰ تمہاری مغفرت کرے“۔“ [صحیح ابن حبان/كتاب البر والإحسان/حدیث: 599]