مسروق بیان کرتے ہیں۔ انہوں نے سیدہ عائشہ رضی اللہ عنہا کو یہ فرماتے ہوئے سنا:
وہ شخصاللہ تعالیٰ کی طرف سب سے بڑی جھوٹی بات منسوب کرتا ہے، جو یہ کہتا ہے، سیدنا محمد صلی اللہ علیہ وسلم نے اپنے پروردگار کو دیکھا ہے، یا جو یہ کہتا ہے، سیدنا محمد صلی اللہ علیہ وسلم نے وحی میں سے کوئی چیز چھپائی تھی۔ (آپ صلی اللہ علیہ وسلم نے ساری باتیں بیان نہیں کی ہیں)
یا جو شخص کہتا ہے، سیدنا محمد صلی اللہ علیہ وسلم یہ جانتے تھے کہ کل کیا ہو گا؟
ان سے دریافت کیا گیا: اے ام المؤمنین پھر نبی اکرم صلی اللہ علیہ وسلم نے کسے دیکھا تھا؟ تو سیدہ عائشہ رضی اللہ عنہا نے فرمایا: وہ سیدنا جبرائیل علیہ السلام تھے، جنہیں نبی اکرم صلی اللہ علیہ وسلم نے ان کی اصل صورت میں دو مرتبہ دیکھا ہے۔ ایک مرتبہ اس وقت جب انہوں نے افق کو بھر دیا تھا، اور ایک مرتبہ اس وقت جب انہوں نے آسمان کے افق کو گھیرا ہوا تھا۔
امام ابوحاتم رحمہ اللہ فرماتے ہیں: جو شخص علم حدیث میں مہارت نہیں رکھتا وہ اس غلط فہمی کا شکار ہوتا ہے کہ یہ دو روایات باہم متضاد ہیں حالانکہ ایسا نہیں ہے۔ کیونکہاللہ تعالیٰ نے اپنے رسول کو دیگر تمام انبیاء پر فضیلت عطا کی ہے۔ یہاں تک کہ سیدنا جبرائیل علیہ السلام اپنے پروردگار کے اتنا قریب ہو گئے جتنا دو کمانوں کا فاصلہ ہوتا ہے اور اس وقت سیدنا جبرائیل علیہ السلام صلی اللہ علیہ وسلم کو تعلیم دی۔ اس وقت نبی اکرم صلی اللہ علیہ وسلم نے انہیں (یا شایداللہ تعالیٰ کو) دل کی آنکھ سے دیکھ لیا جیسے اس نے چاہا۔ سیدہ عائشہ رضی اللہ عنہا سے منقول اس روایت، کے نبی اکرم صلی اللہ علیہ وسلم اس کا ادراک نہیں کر سکتے، کا مفہوم یہ ہے: آپ نیند کے عالم میں اور بیداری کے عالم میں ایسا نہیں کر سکتے۔
اللہ تعالیٰ کا یہ فرمان: ”بصارت اس کا ادراک نہیں کر سکتی“ سے مراد یہ ہے: بصارت اس کا ادراک نہیں کر سکتی، اس کا دیدار قیامت کے دن ہو گا لیکن بصارت جب اس کا دیدار کرے گی تو اس کا ادراک نہیں کر سکے گی، کیونکہ ادراک کا مطلب احاطہ کرنا ہے اور دیدار کا مطلب دیکھنا ہے اوراللہ تعالیٰ کا دیدار ہو سکتا ہے لیکن اس کی حقیقت کا ادراک نہیں ہو سکتا۔ کیونکہ ادراک مخلوق کا ہو سکتا ہے اور بندے کی طرف سے پروردگار کو دیکھنا (ممکن) ہو سکتا ہے۔
سیدہ عائشہ رضی اللہ عنہا سے منقول یہ روایت کہ بصارت اس کا ادراک نہیں کر سکتی، اس سے مراد یہ ہے کہ بصارت دنیا اور آخرت میں اس کا ادراک نہیں کر سکتی لیکن اپنے بندوں میں سے وہ جس پر چاہے فضل کر کے اس کا اہل بنا سکتا ہے۔
لفظ دنیا کا اطلاق کبھی زمینوں اور آسمانوں اور ان کے درمیان موجود جگہ پر ہوتا ہے، کیونکہ ان اشیاء سے آغاز ہوا تھا۔اللہ تعالیٰ نے انہیں اس لئے پیدا کیا تھا تاکہ ان میں آخرت کے لئے نیکیاں کمائی جائیں جو اس آغاز کے بعد گی، تو نبی اکرم صلی اللہ علیہ وسلم نے اپنے پروردگار کا دیدار اس مقام پر کیا ہے جہاں لفظ دنیا کا اطلاق نہیں ہوتا۔ کیونکہ وہ اس وقت دو کمانوں کے درمیان فاصلے سے بھی زیادہ قریب تھے۔ اس لئے سیدہ عائشہ رضی اللہ عنہا سے منقول روایت کا مطلب یہ ہو گا: نبی اکرم صلی اللہ علیہ وسلم نے دنیا میں اس کا دیدار نہیں کیا۔ اس لئے ان دونوں روایات کے درمیان کوئی تضاد اور اختلاف نہیں ہے۔
[صحیح ابن حبان/كتاب الإسراء/حدیث: 60]