جعفر بن عمرو بیان کرتے ہیں: میں عبیداللہ بن عدی کے ساتھ شام گیا، جب ہم لوگ حمص آئے تو عبیداللہ نے مجھ سے کہا: ”کیا تمہیں اس بات میں دلچسپی ہے کہ ہم سیدنا وحشی رضی اللہ عنہ سے سیدنا حمزہ رضی اللہ عنہ کے قتل کرنے کے بارے میں دریافت کریں؟“ میں نے کہا: ”جی ہاں۔“ راوی بیان کرتے ہیں: سیدنا وحشی رضی اللہ عنہ حمص میں سکونت پذیر تھے، ہم نے ان کے بارے میں دریافت کیا تو ہمیں بتایا گیا: ”وہ اپنے محل کے سائے میں موجود ہوں گے یوں جیسے وہ ایک بڑا برتن (مشکیزہ) ہوں۔“ راوی کہتے ہیں: ہم وہاں آئے، ان کے پاس ٹھہر گئے، جب ہم نے سلام کیا تو انہوں نے سلام کا جواب دیا۔ راوی کہتے ہیں: عبیداللہ نے اپنا عمامہ منہ پر لپیٹ لیا تھا، سیدنا وحشی رضی اللہ عنہ کو صرف ان کی دو آنکھیں اور دونوں پاؤں نظر آ رہے تھے۔ راوی کہتے ہیں: عبیداللہ نے ان سے دریافت کیا: ”اے وحشی! کیا آپ نے مجھے پہچان لیا؟“ انہوں نے ان کی طرف دیکھا اور بولے: ”نہیں، اللہ کی قسم! مجھے صرف یہ علم ہے کہ عدی بن خیار نے ایک عورت کے ساتھ شادی کی تھی جسے ام قتال بنت ابی عیص کہا جاتا تھا، اس عورت نے مکہ میں اپنے بچے کو جنم دیا، تو اس کے لیے دودھ پلانے والی کی تلاش کی گئی، میں نے اس لڑکے کو اٹھایا اور اس کی والدہ کے ہمراہ (دودھ پلانے والی کے پاس) گیا، میں نے وہ بچہ اسے پکڑایا، تو مجھے یوں لگ رہا ہے کہ وہ تمہارے ہی پاؤں ہیں (جو اس بچے کے تھے)۔“ راوی کہتے ہیں: عبیداللہ نے اپنے چہرے سے کپڑا ہٹایا اور پھر بولے: ”کیا آپ ہمیں سیدنا حمزہ رضی اللہ عنہ کے قتل کے بارے میں نہیں بتائیں گے؟“ انہوں نے جواب دیا: ”جی ہاں، سیدنا حمزہ رضی اللہ عنہ نے بدر کی جنگ میں طعمہ بن عدی کو قتل کیا تھا۔“ راوی کہتے ہیں، تو میرے آقا جبیر بن مطعم نے مجھ سے کہا: ”اگر تم نے میرے چچا کے بدلے میں حمزہ کو قتل کر دیا تو تم آزاد ہو گے۔“ سیدنا وحشی رضی اللہ عنہ نے بتایا: ”جب عینین کے سال لوگ نکلے (راوی کہتے ہیں: عینین ایک پہاڑ ہے جو احد پہاڑ کے نیچے ہے، یعنی یہ غزوہ احد کے موقع کی بات ہے، ان دونوں پہاڑوں کے درمیان ایک وادی ہے)۔“ سیدنا وحشی رضی اللہ عنہ نے بتایا: ”میں بھی لوگوں کے ساتھ جنگ کے لیے نکلا، جب انہوں نے جنگ کے لیے صف بندی کر لی تو سباع بن ام انمار نکلا، تو اس کے مقابلے میں سیدنا حمزہ بن عبدالمطلب رضی اللہ عنہ آئے، انہوں نے کہا: اے سباع! اے ام انمار کے بیٹے! اے عورتوں کے ختنہ کرنے والی عورت کے بیٹے! کیا تو اللہ اور اس کے رسول کے ساتھ مقابلہ کرنا چاہتا ہے؟“ راوی کہتے ہیں، تو انہوں نے اس پر حملہ کر کے اس کا کام تمام کر دیا۔ سیدنا وحشی رضی اللہ عنہ بیان کرتے ہیں: ”میں سیدنا حمزہ رضی اللہ عنہ کی تاک میں رہا، یہاں تک کہ ایک مرتبہ وہ میرے پاس سے گزرے، جب وہ میرے قریب ہوئے تو میں نے انہیں اپنا چھوٹا نیزہ مارا، میں نے وہ نیزہ ان کے پیٹ میں مارا، یہاں تک کہ وہ ان کی پشت کی طرف سے باہر نکل گیا۔“ سیدنا وحشی رضی اللہ عنہ بتاتے ہیں: ”میرا معاہدہ صرف اتنا ہی تھا، جب وہ لوگ واپس آئے تو میں بھی ان کے ساتھ واپس آ گیا، میں مکہ میں مقیم رہا، یہاں تک کہ وہاں بھی اسلام پھیل گیا تو میں طائف چلا گیا۔“ سیدنا وحشی رضی اللہ عنہ بیان کرتے ہیں: ”کچھ لوگوں نے نبی اکرم صلی اللہ علیہ وسلم کی خدمت میں پیغام رساں بھیجے کیونکہ انہیں یہ بتایا گیا تھا کہ نبی اکرم صلی اللہ علیہ وسلم کسی بھی پیغام رساں کو قتل نہیں کرتے، میں ان پیغام رساں افراد میں شامل ہو کر آیا اور نبی اکرم صلی اللہ علیہ وسلم کی خدمت میں حاضر ہو گیا، جب نبی اکرم صلی اللہ علیہ وسلم نے مجھے دیکھا تو فرمایا: ”تم وحشی ہو؟“ میں نے عرض کی: جی ہاں۔ نبی اکرم صلی اللہ علیہ وسلم نے دریافت کیا: ”تم نے سیدنا حمزہ رضی اللہ عنہ کو شہید کیا تھا؟“ میں نے جواب دیا: صورت حال وہی ہے جو آپ تک پہنچ چکی ہے۔ نبی اکرم صلی اللہ علیہ وسلم نے فرمایا: ”کیا تم یہ کر سکتے ہو کہ تم اپنا چہرہ مجھ سے چھپا لو (یعنی آئندہ میرے سامنے نہ آنا)؟“ سیدنا وحشی رضی اللہ عنہ بیان کرتے ہیں: میں وہاں سے نکلا، جب نبی اکرم صلی اللہ علیہ وسلم کا وصال ہوا تو مسیلمہ کذاب نے خروج کیا، میں نے سوچا میں مسیلمہ کی طرف ضرور جاؤں گا، ہو سکتا ہے میں اسے قتل کر دوں، تو اس طرح میں سیدنا حمزہ رضی اللہ عنہ کے قتل کا بدلہ چکا دوں گا۔ میں لوگوں کے ساتھ نکلا، ان کے ساتھ جو ہونا تھا وہ ہوا (یعنی جنگ کے دوران)، میں نے ایک چھوٹے قد کے شخص کو دیکھا جو ایک دیوار کے پاس کھڑا ہوا تھا، وہ خاکستری اونٹ لگتا تھا، میں نے اسے اپنا نیزہ مارا، وہ اس کے سینے کے درمیان آ کر لگا اور دونوں کندھوں کے درمیان میں سے نکل گیا۔ انصار سے تعلق رکھنے والا ایک شخص آگے بڑھا اور اس نے اس کی گردن پر تلوار مار دی۔ یہاں ایک روایت میں یہ الفاظ ہیں، سیدنا عبداللہ بن عمر رضی اللہ عنہما بیان کرتے ہیں: گھر کی چھت پر ایک لڑکی نے کہا: ”امیر المؤمنین (یعنی مسیلمہ کذاب) کو ایک سیاہ فام غلام نے قتل کر دیا ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7017]