سیدنا جابر بن عبداللہ رضی اللہ عنہما بیان کرتے ہیں: میرے والد نے خزیرہ بنانے کا حکم دیا، وہ تیار ہو گیا تو انہوں نے مجھے حکم دیا، میں اسے اٹھا کر نبی اکرم صلی اللہ علیہ وسلم کی خدمت میں آیا، جب میں نبی اکرم صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم اپنے گھر میں موجود تھے۔ آپ صلی اللہ علیہ وسلم نے دریافت کیا: ”یہ کیا ہے جابر؟ کیا یہ گوشت ہے؟“ میں نے عرض کی: جی نہیں، یہ خزیرہ ہے۔ نبی اکرم صلی اللہ علیہ وسلم کے حکم کے تحت وہ لے لیا گیا۔ جب میں اپنے والد کی طرف واپس آیا تو انہوں نے دریافت کیا: کیا تم نے نبی اکرم صلی اللہ علیہ وسلم کو دیکھا تھا؟ میں نے جواب دیا: جی ہاں۔ انہوں نے دریافت کیا: کیا نبی اکرم صلی اللہ علیہ وسلم نے کچھ کہا تھا؟ میں نے جواب دیا: جی ہاں، نبی اکرم صلی اللہ علیہ وسلم نے دریافت کیا: ”اے جابر! یہ کیا ہے؟ کیا یہ گوشت والی چیز ہے؟“ تو میرے والد نے کہا: شاید نبی اکرم صلی اللہ علیہ وسلم کا گوشت کھانے کو جی چاہ رہا ہو گا، وہ اٹھے اور بکری کے پاس گئے اور بکری کو ذبح کیا، پھر ان کے حکم کے تحت اسے بھون لیا گیا، پھر انہوں نے مجھے حکم دیا تو میں وہ گوشت اٹھا کر نبی اکرم صلی اللہ علیہ وسلم کی خدمت میں گیا، جب میں نبی اکرم صلی اللہ علیہ وسلم کے پاس پہنچا تو آپ صلی اللہ علیہ وسلم اپنی اسی محفل میں تشریف فرما تھے۔ نبی اکرم صلی اللہ علیہ وسلم نے دریافت کیا: ”اے جابر! یہ کیا ہے؟“ میں نے عرض کی: یا رسول اللہ صلی اللہ علیہ وسلم ! میں اپنے والد کے پاس گیا، انہوں نے دریافت کیا: کیا نبی اکرم صلی اللہ علیہ وسلم نے کچھ کہا تھا؟ میں نے جواب دیا: جی ہاں، نبی اکرم صلی اللہ علیہ وسلم نے دریافت کیا تھا: ”کیا یہ گوشت والی چیز ہے؟“ میرے والد نے کہا: ہو سکتا ہے نبی اکرم صلی اللہ علیہ وسلم کا گوشت کھانے کو جی چاہ رہا ہو، وہ اپنی بکری کے پاس گئے، انہوں نے اسے ذبح کیا، ان کے حکم کے تحت اسے پکا لیا گیا، پھر انہوں نے مجھے ہدایت کی تو میں وہ گوشت اٹھا کر آپ صلی اللہ علیہ وسلم کے پاس آ گیا۔ نبی اکرم صلی اللہ علیہ وسلم نے فرمایا: ”اللہ تعالیٰ ہماری طرف سے انصار کو جزائے خیر عطا کرے، بطور خاص عبداللہ بن عمرو بن حرام رضی اللہ عنہ کو اور سعد بن عبادہ رضی اللہ عنہ کو۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7020]