ابن ابی ملیکہ بیان کرتے ہیں کہ سیدنا عبداللہ بن عباس رضی اللہ عنہما سیدہ عائشہ رضی اللہ عنہا کی خدمت میں حاضر ہوئے، انہوں نے اندر آنے کی اجازت مانگی، سیدہ عائشہ رضی اللہ عنہا نے کہا: مجھے ان سے ملاقات کی ضرورت نہیں ہے۔ سیدنا عبدالرحمن بن ابوبکر رضی اللہ عنہما نے عرض کی: ابن عباس رضی اللہ عنہما آپ کے نیک بیٹوں میں سے ایک ہیں، وہ آپ کی عیادت کرنے کے لیے آپ کے پاس آئے ہیں، تو سیدہ عائشہ رضی اللہ عنہا نے انہیں اجازت دے دی، وہ اندر آئے اور انہوں نے کہا: اے امی جان! آپ کے لیے خوشخبری ہے، اللہ تعالیٰ کی قسم! آپ کی نبی اکرم صلی اللہ علیہ وسلم سے ملاقات اور دیگر محبوب لوگوں سے آپ کی ملاقات کے درمیان صرف اتنا فاصلہ رہ گیا ہے کہ آپ کی روح آپ کے جسم سے جدا ہو جائے، آپ نبی اکرم صلی اللہ علیہ وسلم کی ازواج میں سے نبی اکرم صلی اللہ علیہ وسلم کے نزدیک سب سے زیادہ محبوب تھیں اور نبی اکرم صلی اللہ علیہ وسلم صرف کسی پاکیزہ چیز سے ہی محبت کرتے تھے۔ سیدہ عائشہ رضی اللہ عنہا نے کہا: (اور بھی میرے اندر کوئی خوبی ہے؟) تو سیدنا عبداللہ بن عباس رضی اللہ عنہما نے عرض کی: ابواء کے مقام پر آپ کا ہار گم ہو گیا، نبی اکرم صلی اللہ علیہ وسلم نے صبح کی، تو لوگوں کو پانی نہیں ملا، تو انہوں نے پاکیزہ مٹی کے ذریعے تیمم کر لیا، یہ آپ کے سبب اور آپ کی برکت کی وجہ سے تھا، اللہ تعالیٰ نے اس امت کے لیے یہ رخصت نازل کی، پھر مسطح کا جو معاملہ تھا وہ بھی تھا، اللہ تعالیٰ نے سات آسمانوں کے اوپر سے آپ کی برأت کا حکم نازل کیا، کوئی بھی مسجد ایسی نہیں ہے جس میں اللہ تعالیٰ کا ذکر کیا جاتا ہو، اس میں آپ کے معاملے سے متعلق آیات کی تلاوت بھی رات دن کی جائے گی۔ سیدہ عائشہ رضی اللہ عنہا نے فرمایا: اے ابن عباس! تم میری اتنی تعریفیں نہ کرو، اللہ کی قسم! میری تو یہ خواہش ہے کہ کاش میں ﴿نَسْيًا مَنْسِيًّا﴾ [سورة مريم: 23] ”کوئی بھولی بسری چیز“ ہوتی۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7108]