خالد بن عمیر بیان کرتے ہیں کہ سیدنا عتبہ بن غزوان رضی اللہ عنہ نے خطبہ دیتے ہوئے اللہ تعالیٰ کی حمد و ثناء بیان کی، پھر وہ بولے: «أَمَّا بَعْدُ» ”اما بعد! دنیا، اس میں سے اب وہ تلچھٹ باقی رہ گئی ہے جو کسی برتن میں رہ جاتی ہے اور تم میں سے کوئی ایک شخص اسے انڈیل دیتا ہے، تم لوگ اس دنیا سے ایک ایسے جہان کی طرف منتقل ہو گے جو زائل نہیں ہو گا، تو جو کچھ تمہارے پاس موجود ہے اسے منتقل کرو۔“ ان کی مراد بھلائی تھی کیونکہ مجھ تک یہ روایت پہنچی ہے کہ: ”ایک پتھر اگر جہنم کے کنارے سے پھینکا جائے، تو وہ اس کی گہرائی تک ستر سال تک بھی نہیں پہنچ سکتا۔“ اللہ کی قسم! وہ جہنم ضرور بھری جائے گی۔ کیا تمہیں اس بات پر حیرانگی ہو رہی ہے؟ میرے سامنے یہ بات ذکر کی گئی ہے کہ: ”جنت کے دو کواڑوں کے درمیان چالیس سال کی مسافت کا فاصلہ ہے“ اور اس پر ایک ایسا دن آئے گا کہ جب وہاں لوگوں کا ہجوم ہو گا، مجھے اپنے بارے میں یہ بات یاد ہے کہ نبی اکرم صلی اللہ علیہ وسلم کے ساتھ ہم سات افراد تھے، ہماری خوراک صرف درخت کے پتے ہوتے تھے یہاں تک کہ ہماری باچھیں چر گئی تھیں، ایک مرتبہ مجھے ایک چادر پڑی ہوئی ملی تو میں نے اسے چیر کر اپنے اور سیدنا سعد رضی اللہ عنہما کے درمیان تقسیم کر لیا، میں نے اس کے نصف حصے کو تہبند بنا لیا اور نصف حصے کو سیدنا سعد رضی اللہ عنہ نے تہبند بنا لیا، آج ہم میں سے ہر شخص جو زندہ ہے وہ کسی نہ کسی شہر کا گورنر ہے، میں اللہ سے اس بات کی پناہ مانگتا ہوں کہ میں خود کو بڑا سمجھتا ہوں اور اللہ تعالیٰ کی بارگاہ میں چھوٹا ہوں۔ نبوت کا سلسلہ ختم ہو گیا ہے اور اس کے بعد بادشاہی آئے گی، تو ہمارے بعد تم لوگ حکمرانوں کے حوالے سے آزمائے جاؤ گے۔ شیخ بیان کرتے ہیں: ابویعلیٰ نے حمید بن ہلال سے خالد بن عمیر کے حوالے سے یہ روایت بیان کی ہے حالانکہ راوی کا نام خالد بن سمیر ہے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7121]