سیدنا انس رضی اللہ عنہ بیان کرتے ہیں کہ جب یہ آیت ﴿اے ایمان والو! تم اپنی آوازوں کو نبی اکرم صلی اللہ علیہ وسلم کی آواز سے بلند نہ کرو﴾ [سورة الحجرات: 2] نازل ہوئی تو سیدنا ثابت بن قیس رضی اللہ عنہ نے کہا: اللہ کی قسم! میں وہ شخص ہوں کہ میری آواز نبی اکرم صلی اللہ علیہ وسلم کے سامنے اونچی ہوتی ہے، تو مجھے اس بات کا اندیشہ ہے کہ اللہ تعالیٰ مجھ پر غضب ناک ہو گا، اس بات پر وہ غمگین ہو گئے اور ان کا رنگ زرد ہو گیا۔ نبی اکرم صلی اللہ علیہ وسلم نے ان کی غیر موجودگی محسوس کر کے ان کے بارے میں دریافت کیا، تو آپ کو بتایا گیا: اے اللہ کے نبی! وہ یہ کہتے ہیں کہ مجھے یہ اندیشہ ہے کہ کہیں میں اہل جہنم میں سے نہ ہو جاؤں کیونکہ میری آواز نبی اکرم صلی اللہ علیہ وسلم کے سامنے بلند ہو جاتی ہے۔ نبی اکرم صلی اللہ علیہ وسلم نے فرمایا: ”(جی نہیں) بلکہ وہ اہل جنت میں سے ہے“۔ (سیدنا انس رضی اللہ عنہ بیان کرتے ہیں) تو ہم انہیں ایک جنتی شخص کے طور پر اپنے درمیان چلتا پھرتا دیکھتے تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7169]