سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے منبر پر ارشاد فرمایا: ”اللہ تعالیٰ آسمانوں اور زمینوں کو اپنے دستِ قدرت میں پکڑے گا، پھر فرمائے گا: میں اللہ ہوں، پھر وہ اپنی انگلیوں کو بند کرے گا، پھر انہیں کھولے گا، پھر فرمائے گا: میں رحمن ہوں، میں بادشاہ ہوں۔“ (راوی بیان کرتے ہیں:) یہاں تک کہ میں نے منبر کی طرف دیکھا کہ وہ نبی اکرم صلی اللہ علیہ وسلم کے نیچے ڈول رہا تھا، یہاں تک کہ میں سوچنے لگا کہ یہ نبی اکرم صلی اللہ علیہ وسلم سمیت گر تو نہیں جائے گا۔ (امام ابن حبان رحمہ اللہ فرماتے ہیں:) روایت کے یہ الفاظ: ”وہ اپنی انگلیوں کو بند کر رہے تھے اور کھول رہے تھے۔“ اس کے ذریعے نبی اکرم صلی اللہ علیہ وسلم مراد ہیں، اللہ تعالیٰ مراد نہیں ہے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7324]