سیدنا عبداللہ رضی اللہ عنہ بیان کرتے ہیں کہ اہل کتاب سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا اور اس نے عرض کی: ”بے شک اللہ تعالیٰ آسمانوں کو اپنی ایک انگلی میں پکڑے گا، پانی کو اور زمین کو اپنی ایک انگلی پر رکھے گا اور تمام مخلوقات کو اپنی ایک انگلی پر رکھے گا اور پھر یہ فرمائے گا: «أَنَا الْمَلِكُ» ”میں بادشاہ ہوں۔““ (راوی بیان کرتے ہیں:) تو نبی اکرم صلی اللہ علیہ وسلم مسکرا دیے، یہاں تک کہ آپ کے اطراف کے دانت نظر آنے لگے۔ پھر آپ نے یہ آیت تلاوت فرمائی: ﴿انہوں نے اللہ تعالیٰ کی حقیقی قدر نہیں کی قیامت کے دن تمام زمین اس کے قبضہ قدرت میں ہو گی اور آسمان اس کے دائیں ہاتھ میں لپٹے ہوئے ہوں گے۔ اس کی ذات اس چیز سے پاک ہے اور بلند و برتر ہے، جو وہ شرک کرتے ہیں﴾ [سورة الزمر: 67] ۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7325]