یعقوب بن عاصم بیان کرتے ہیں: میں نے ایک شخص کو سیدنا عبداللہ بن عمرو رضی اللہ عنہما سے یہ کہتے ہوئے سنا: آپ یہ کہتے ہیں کہ قیامت اتنے اتنے عرصے کے لیے قائم ہو گی، تو سیدنا عبداللہ بن عمرو رضی اللہ عنہما نے فرمایا: پہلے میں نے یہ ارادہ کیا تھا کہ میں تمہیں کوئی حدیث بیان نہیں کروں گا لیکن پھر میں نے سوچا کہ تم تھوڑے ہی عرصے کے بعد ایک بڑا واقعہ دیکھو گے۔ سیدنا عبداللہ بن عمرو رضی اللہ عنہما نے بتایا کہ نبی اکرم صلی اللہ علیہ وسلم نے ارشاد فرمایا: ”میری امت میں دجال نکلے گا، وہ لوگوں میں چالیس تک رہے گا (راوی کہتے ہیں:) لیکن مجھے نہیں معلوم اس سے مراد چالیس دن ہیں یا چالیس سال ہیں یا چالیس راتیں ہیں یا چالیس مہینے ہیں۔ پھر اللہ تعالیٰ عیسیٰ بن مریم علیہ السلام کو اس کی طرف بھیجے گا، ان کی شکل عروہ بن مسعود ثقفی کی طرح ہو گی، وہ اسے تلاش کر کے اسے ہلاک کر دیں گے، پھر اس کے بعد سات سال تک لوگوں کے درمیان رہیں گے۔ اس دوران دو آدمیوں کے درمیان کوئی دشمنی نہیں ہو گی، پھر اللہ تعالیٰ شام کی طرف سے ایک ہوا بھیجے گا۔ کوئی ایسا شخص زندہ نہیں رہے گا جس میں رائی کے دانے جتنا ایمان ہو، وہ ہوا اس کی روح کو قبض کر لے گی، یہاں تک کہ اگر کوئی شخص کسی پہاڑ کی غار میں ہو گا تو ہوا اس تک بھی پہنچ جائے گی۔“ (سیدنا عبداللہ بن عمرو رضی اللہ عنہما نے بتایا) میں نے نبی اکرم صلی اللہ علیہ وسلم کی زبانی یہ بات بھی سنی ہے: ”پھر برے لوگ پرندے کے ٹھکانوں اور درندوں کی کچھاروں میں باقی رہ جائیں گے، وہ نیکی سے واقف نہیں ہوں گے اور برائی کو برائی نہیں سمجھیں گے۔ شیطان ان کے سامنے انسانی شکل میں آئے گا اور انہیں بتوں کی عبادت کرنے کا حکم دے گا، تو وہ ان کی عبادت شروع کر دیں گے۔ اس وقت میں ان کا رزق عمدہ ہو گا، ان کی زندگی بظاہر عمدہ ہو گی، پھر صور میں پھونک ماری جائے گی، جو بھی اسے سنے گا وہ گر جائے گا، پھر کوئی بھی شخص باقی نہیں رہے گا، ہر شخص مر جائے گا، پھر اللہ تعالیٰ ایک بارش کو بھیجے گا جو ہلکی ہو گی (یہاں پر نعمان نامی راوی کو شک ہے) یا موسلا دھار ہو گی، اس بارش کے ہمراہ لوگوں کے جسم اگنا شروع ہوں گے۔ پھر صور میں دوبارہ پھونک ماری جائے گی، تو وہ لوگ کھڑے ہو کر دیکھنے لگیں گے۔ پھر یہ کہا جائے گا: اے لوگو! اپنے پروردگار کی طرف چل پڑو۔“ (ارشاد باری تعالیٰ ہے:) ﴿وَقِفُوهُمْ ۖ إِنَّهُم مَّسْئُولُونَ﴾ [سورة الصافات: 24] ”ان لوگوں کو روک لو ان سے حساب لیا جائے گا۔“ پھر یہ کہا جائے گا: ان میں سے جہنم میں جانے والے لوگوں کو نکال لو۔ پھر دریافت کیا جائے گا: کتنوں کو؟ تو یہ کہا جائے گا: ایک ہزار میں سے نو سو ننانوے افراد کو۔ نبی اکرم صلی اللہ علیہ وسلم فرماتے ہیں: ”اس دن بچوں کو بزرگوں کی شکل میں زندہ کیا جائے گا اور اس دن ﴿يَوْمَ يُكْشَفُ عَن سَاقٍ﴾ [سورة القلم: 42] (یعنی معاملہ سخت ہو گا)۔“ محمد بن جعفر نامی راوی کہتے ہیں: شعبہ نے یہ حدیث کئی مرتبہ ہمیں بیان کی ہے اور کئی مرتبہ میں نے بھی یہ ان کے سامنے پڑھی ہے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7353]