سعید بن مسیب اپنے والد کا یہ بیان نقل کرتے ہیں: جب جناب ابوطالب کی وفات کا وقت قریب آیا، تو نبی اکرم صلی اللہ علیہ وسلم تشریف لائے اس وقت جناب ابوطالب کے پاس ابوجہل اور عبداللہ بن ابوامیہ بھی موجود تھے۔ نبی اکرم صلی اللہ علیہ وسلم نے فرمایا: اے چچا جان! آپ ”لا الہ الا اللہ“ پڑھ لیجئے اس کلمہ کی وجہ سے میںاللہ تعالیٰ کی بارگاہ میں آپ کے لئے گواہی دوں گا۔ ابوجہل اور عبداللہ بن ابوامیہ بولے: اے ابوطالب! کیا تم عبدالمطلب کے دین سے منہ موڑ رہے ہو؟ راوی بیان کرتے ہیں: نبی اکرم صلی اللہ علیہ وسلم ان کے سامنے مسلسل یہی پیشکش کرتے رہے اور یہی بات دہراتے رہے، یہاں تک کہ جناب ابوطالب نے ان لوگوں کے ساتھ جو آخری بات کی وہ یہ تھی۔ کہ وہ عبدالمطلب کے دین پر ہیں۔ انہوں نے ”لا الہ الا الله“ پڑھنے سے انکار کر دیا تھا، تو نبی اکرم صلی اللہ علیہ وسلم نے ارشاد فرمایا: ”میں آپ کے لئے اس وقت تک دعائے مغفرت کرتا رہوں گا، جب تک مجھے اس سے منع نہیں کر دیا جاتا۔“ تو یہ آیت نازل ہوئی: ”نبی اور اہل ایمان کے لئے یہ بات مناسب نہیں ہے، وہ مشرکین کے لئے دعائے مغفرت کریں اگرچہ وہ ان کے قریبی عزیز ہی کیوں نہ ہوں اس کے بعد کہ ان لوگوں کے سامنے یہ بات واضح ہو چکی ہو کہ وہ لوگ جہنمی ہیں۔“ (راوی بیان کرتے ہیں) یہ آیت جناب ابوطالب کے بارے میں نازل ہوئی تھی۔ ”بے شک تم اسے ہدایت نہیں دیتے، جسے تم پسند کرتے ہو،اللہ تعالیٰ جسے چاہتا ہے اسے ہدایت دیتا ہے۔ وہ ہدایت پانے والوں کے بارے میں زیادہ جانتا ہے۔“ [صحیح ابن حبان/كتاب الرقائق/حدیث: 982]