عمیر بن سعید نخعی سے روایت ہے کہ انہوں نے سیدنا علی رضی اللہ عنہ کو لوگوں کو یہ خبر دیتے ہوئے سنا کہ: ”یہ ستارہ جسے عرب ”الزہرہ“ اور عجمی ”آناہید“ کہتے ہیں، (اس کا قصہ یہ ہے کہ) دو فرشتے لوگوں کے درمیان فیصلے کیا کرتے تھے۔ ان کے پاس ایک عورت آئی تو ان میں سے ہر ایک نے اپنے ساتھی کو بتائے بغیر اس کے بارے میں (غلط) ارادہ کیا۔ پھر ایک نے اپنے ساتھی سے کہا: اے بھائی! میرے دل میں ایک بات ہے جو میں تجھ سے کہنا چاہتا ہوں۔ اس نے جواب دیا: اے بھائی! بیان کر دو، شاید میرے دل میں بھی وہی کچھ ہو جو تمہارے دل میں ہے۔ چنانچہ وہ دونوں اس بات پر متفق ہو گئے۔ اس عورت نے ان سے کہا: کیا تم مجھے وہ (اسم) نہیں بتاؤ گے جس کے ذریعے تم آسمان پر چڑھتے اور زمین پر اترتے ہو؟ انہوں نے کہا: ہم «بِاسْمِ اللّٰهِ الْأَعْظَمِ» ”اللہ کے اسمِ اعظم“ کے ذریعے اترتے اور اسی کے ذریعے چڑھتے ہیں۔ اس نے کہا: میں تمہاری مراد اس وقت تک پوری نہیں کروں گی جب تک تم مجھے وہ (کلمہ) سکھا نہیں دیتے۔ ایک نے اپنے ساتھی سے کہا: اسے یہ سکھا دو۔ دوسرے نے کہا: ہم اللہ کے سخت عذاب کا سامنا کیسے کریں گے؟ پہلے نے کہا: ہم اللہ کی رحمت کی وسعت کی امید رکھتے ہیں۔ چنانچہ انہوں نے وہ کلمہ اسے سکھا دیا، پس اس نے وہ کلمہ بولا اور آسمان کی طرف اڑ گئی۔ آسمان پر موجود ایک فرشتہ اس کے چڑھنے سے گھبرا گیا اور اپنا سر جھکا لیا، اور وہ اس کے بعد (سیدھا ہو کر) نہیں بیٹھا۔ پھر اللہ نے اس عورت کو مسخ کر دیا اور وہ ایک ستارہ بن گئی۔“ [المستدرك على الصحيحين/كتاب التفسير/حدیث: 3088]