محمد بن عمر اپنے شیوخ سے روایت کرتے ہیں، انہوں نے کہا: سیدنا زبیر رضی اللہ عنہ جنگِ جمل کے دن، جو کہ اس سال 10 جمادی الآخر بروز جمعرات کا دن تھا، معرکے کے بعد ”ذو الخمار“ نامی گھوڑے پر سوار ہو کر مدینہ منورہ کی طرف روانہ ہوئے، پس وہ وادیِ سباع میں شہید کیے گئے اور وہیں دفن ہوئے، اور سیدنا عروہ بن زبیر رضی اللہ عنہ سے مروی ہے، انہوں نے فرمایا: میرے والد جنگِ جمل کے دن شہید ہوئے اور ان کی عمر ساٹھ سال سے چار سال زائد (یعنی 64 سال) تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5669]

ابن عمر سے مروی ہے کہ میں نے مصعب بن ثابت بن عبداللہ بن زبیر کو کہتے ہوئے سنا: سیدنا زبیر بن عوام رضی اللہ عنہ غزوۂ بدر میں شریک ہوئے تو ان کی عمر 27 سال تھی، اور جب وہ شہید ہوئے تو ان کی عمر 64 سال تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5669M]