سیدنا ابن عباس رضی اللہ عنہما سے روایت ہے کہ سیدنا ابو ایوب خالد بن زید رضی اللہ عنہ، جن کے گھر رسول اللہ صلی اللہ علیہ وسلم نے ہجرت مدینہ کے وقت قیام فرمایا تھا، ارضِ روم میں ایک غزوے کے لیے نکلے، پھر ان کا گزر سیدنا معاویہ رضی اللہ عنہ کے پاس سے ہوا تو انہوں نے ان کے ساتھ بے رخی برتی، جب وہ غزوے سے واپس آئے تو دوبارہ انہوں نے بے رخی دکھائی اور ان کی طرف توجہ نہ دی، سیدنا ابو ایوب رضی اللہ عنہ نے فرمایا: ”رسول اللہ صلی اللہ علیہ وسلم نے مجھے خبر دی تھی کہ ہم آپ صلی اللہ علیہ وسلم کے بعد اپنے اوپر دوسروں کو ترجیح دیے جانے (اور اپنی حق تلفی) کا مشاہدہ کریں گے“، سیدنا معاویہ رضی اللہ عنہ نے پوچھا: ”تو آپ صلی اللہ علیہ وسلم نے تمہیں کیا حکم دیا تھا؟“ انہوں نے جواب دیا: ”آپ صلی اللہ علیہ وسلم نے ہمیں صبر کرنے کا حکم دیا تھا“، انہوں نے کہا: ”تو پھر صبر ہی کرو“۔ اس کے بعد وہ بصرہ میں سیدنا عبداللہ بن عباس رضی اللہ عنہما کے پاس آئے جنہیں سیدنا علی رضی اللہ عنہ نے وہاں کا گورنر مقرر کیا تھا، تو ابن عباس رضی اللہ عنہما نے فرمایا: ”اے ابو ایوب! میں چاہتا ہوں کہ میں آپ کے لیے اپنے گھر سے اسی طرح نکل جاؤں جیسے آپ رسول اللہ صلی اللہ علیہ وسلم کے لیے اپنے گھر سے نکلے تھے“، چنانچہ انہوں نے اپنے اہل و عیال کو حکم دیا اور وہ گھر سے باہر آ گئے اور جو کچھ گھر میں موجود تھا وہ سب انہیں دے دیا، جب ان کی روانگی کا وقت آیا تو ابن عباس رضی اللہ عنہما نے پوچھا: ”آپ کی کیا حاجت ہے؟“ انہوں نے کہا: ”میری ضرورت میرا وظیفہ اور آٹھ غلام ہیں جو میری زمین میں کام کریں“، ان کا وظیفہ چار ہزار تھا تو ابن عباس رضی اللہ عنہما نے اسے پانچ گنا کر کے بیس ہزار کر دیا اور انہیں چالیس غلام عطا فرمائے۔
یہ حدیث پہلے بھی ایک متصل صحیح سند کے ساتھ گزر چکی ہے، میں نے اسے اس میں موجود مزید تفصیلات کی وجہ سے اس سند کے ساتھ دوبارہ ذکر کیا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6054]