سیدنا عبداللہ بن عباس رضی اللہ عنہما سے روایت ہے، انہوں نے کہا: میں سیدنا عمر بن خطاب رضی اللہ عنہ کے پاس بیٹھا تھا کہ ان کے پاس ایک خط آیا جس میں یہ اطلاع تھی کہ اہل کوفہ میں سے اتنے اتنے لوگوں نے قرآن پڑھ (حفظ کر) لیا ہے، تو انہوں نے (خوشی سے) اللہ کی کبریائی بیان کی، میں نے عرض کیا: ”وہ باہم اختلاف کریں گے؟“ انہوں نے (ناگواری سے) کہا: ”افسوس! تمہیں یہ بات کیسے معلوم ہوئی؟“ ابن عباس رضی اللہ عنہما کہتے ہیں کہ میں (ان کے ڈانٹنے پر) غصے میں گھر آگیا، پھر انہوں نے تھوڑی دیر بعد مجھے بلایا تو میں نے معذرت چاہی لیکن انہوں نے کہا: ”میں تم پر زور دے کر کہتا ہوں کہ ضرور آؤ،“ پس میں ان کے پاس آیا، انہوں نے کہا: ”تم نے ایک بات کہی تھی،“ میں نے عرض کیا: میں اللہ سے معافی مانگتا ہوں اور آئندہ ایسی بات نہیں کروں گا، انہوں نے فرمایا: ”میں تم پر تاکید کرتا ہوں کہ تم نے جو کہا تھا اسے میرے سامنے دہراؤ،“ میں نے عرض کیا: (خط میں) لکھا تھا کہ اتنے لوگوں نے قرآن پڑھ لیا ہے تو میں نے کہا کہ وہ اختلاف کریں گے، انہوں نے پوچھا: ”تمہیں یہ بات کس بنیاد پر معلوم ہوئی؟“ میں نے عرض کیا: میں نے یہ آیت پڑھی ہے: ﴿وَمِنَ النَّاسِ مَنْ يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللَّهَ عَلَى مَا فِي قَلْبِهِ﴾ ”اور لوگوں میں سے کوئی ایسا بھی ہے جس کی گفتگو دنیاوی زندگی میں آپ کو بھلی لگتی ہے اور وہ اپنے دل کی بات پر اللہ کو گواہ بناتا ہے“ یہاں تک کہ میں اس آیت پر پہنچا ﴿وَاللَّهُ لَا يُحِبُّ الْفَسَادَ﴾ ”اور اللہ فساد کو پسند نہیں کرتا۔“ [سورة البقرة: 204 - 205] پس جب وہ (منافقین) ایسا کریں گے تو قرآن والا (مخلص مومن) خاموش نہیں رہ سکے گا، پھر میں نے یہ آیات پڑھیں: ﴿وَإِذَا قِيلَ لَهُ اتَّقِ اللَّهَ أَخَذَتْهُ الْعِزَّةُ بِالْإِثْمِ فَحَسْبُهُ جَهَنَّمُ وَلَبِئْسَ الْمِهَادُ (206) وَمِنَ النَّاسِ مَنْ يَشْرِي نَفْسَهُ ابْتِغَاءَ مَرْضَاتِ اللَّهِ وَاللَّهُ رَءُوفٌ بِالْعِبَادِ﴾ ”اور جب اس سے کہا جاتا ہے کہ اللہ سے ڈرو تو اسے اس کا غرور گناہ پر آمادہ کر دیتا ہے، پس اس کے لیے جہنم کافی ہے اور وہ بہت برا ٹھکانا ہے، اور لوگوں میں سے وہ بھی ہے جو اللہ کی رضا جوئی کے لیے اپنی جان بیچ ڈالتا ہے اور اللہ بندوں پر بہت مہربان ہے۔“ [سورة البقرة: 206 - 207] تو سیدنا عمر رضی اللہ عنہ نے فرمایا: ”تم نے سچ کہا، اس ذات کی قسم جس کے قبضے میں میری جان ہے (حقیقت یہی ہے)۔“
یہ حدیث شیخین کی شرط پر صحیح ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6434]