مکحول سے روایت ہے کہ میں واثلہ بن اسقع رضی اللہ عنہ کی خدمت میں حاضر ہوا اور عرض کیا: اے ابواسقع! ہمیں رسول اللہ صلی اللہ علیہ وسلم سے سنی ہوئی کوئی ایسی حدیث سنائیں جس میں نہ تو کسی قسم کا وہم ہو، نہ کوئی زیادتی اور نہ ہی بھول چوک کا امکان ہو، انہوں نے دریافت فرمایا: کیا تم میں سے کسی نے آج رات قرآن مجید کی تلاوت کی ہے؟ ہم نے عرض کیا: جی ہاں، لیکن ہم نے اسے (حرف بہ حرف) ویسے یاد نہیں رکھا (جیسے وہ نازل ہوا)، انہوں نے فرمایا: یہ قرآن تمہارے درمیان لکھا ہوا موجود ہے اور تم اس کی حفاظت میں کوئی کسر نہیں چھوڑتے، اس کے باوجود تمہارا یہ خیال ہے کہ تم اس میں کمی یا زیادتی کر دیتے ہو، تو پھر ان احادیث کا کیا حال ہوگا جو ہم نے رسول اللہ صلی اللہ علیہ وسلم سے سنی ہیں اور ہو سکتا ہے کہ ہم نے انہیں صرف ایک ہی مرتبہ سنا ہو؟ تمہارے لیے اتنا ہی کافی ہے کہ جب ہم تمہارے سامنے کوئی حدیث بیان کریں تو اس کا مفہوم (درست طور پر) بیان کر دیں۔ ان کی ایک کنیت ابوقرصافہ بھی بتائی گئی ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6563]