رسول اللہ صلی اللہ علیہ وسلم کے آزاد کردہ غلام سیدنا سفینہ رضی اللہ عنہ سے روایت ہے کہ میں سمندر میں سفر کر رہا تھا کہ میری کشتی ٹوٹ گئی، میں اس کے ایک تختے پر سوار ہو گیا، اس تختے نے مجھے ایک ایسی جھاڑی میں پھینک دیا جہاں شیر رہتا تھا، وہ شیر میری طرف بڑھا تو میں نے کہا: ”اے ابوالحارث (شیر کی کنیت)! میں رسول اللہ صلی اللہ علیہ وسلم کا غلام ہوں“، تو اس نے اپنا سر جھکا لیا اور میری طرف آیا، اس نے اپنے کندھے سے مجھے دھکا دے کر جھاڑی سے باہر نکالا اور مجھے راستے پر لا کھڑا کیا، پھر وہ دھیمی آواز میں غرایا، میرا خیال ہے کہ وہ مجھے الوداع کہہ رہا تھا، یہ میرا اس کے ساتھ آخری واسطہ تھا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ (اس کے بعد) سیدنا زیاد بن لبید انصاری رضی اللہ عنہ کا ذکر ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6695]

عروہ سے انصار کے ان صحابہ کے ناموں کے تذکرہ میں جو غزوہ بدر میں شریک تھے، روایت ہے کہ بنو بیاضہ بن عامر بن زریق سے زیاد بن لبید بن ثعلبہ بن سنان بن عامر بن عدی بن امیہ بن بیاضہ بھی شامل تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6695M1]

ابن شہاب سے انصار کے ان صحابہ کے ناموں کے تذکرہ میں جو بیعت عقبہ میں شریک تھے، روایت ہے کہ بنو بیاضہ سے زیاد بن لبید بھی شامل تھے اور وہ غزوہ بدر میں بھی شریک ہوئے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6695M2]

سیدنا زیاد بن لبید انصاری رضی اللہ عنہ سے روایت ہے، انہوں نے کہا: میں نبی کریم صلی اللہ علیہ وسلم کی خدمت میں حاضر ہوا جبکہ آپ اپنے صحابہ سے گفتگو فرما رہے تھے اور فرما رہے تھے: ”علم (کے رخصت ہونے) کا وقت آ گیا ہے“، میں نے عرض کی: میرے ماں باپ آپ پر قربان ہوں، علم کیسے رخصت ہو گا جبکہ ہم قرآن پڑھتے ہیں، اپنے بیٹوں کو پڑھاتے ہیں اور ہمارے بیٹے اپنے بیٹوں کو قیامت تک پڑھاتے رہیں گے؟! آپ صلی اللہ علیہ وسلم نے فرمایا: ”اے ابن لبید! تمہاری ماں تمہیں گم پائے، میں تو تمہیں اہل مدینہ میں سب سے زیادہ سمجھدار سمجھتا تھا، کیا یہودی اور نصرانی تورات اور انجیل نہیں پڑھتے لیکن وہ ان سے ذرہ برابر بھی فائدہ نہیں اٹھاتے؟“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔
(اس کے بعد) سیدنا سعد بن ربیع انصاری رضی اللہ عنہ کا ذکر ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6695M3]