حضرت قیس بن وہب رحمہ اللہ قبیلہ بنو سواۃ کے ایک آدمی سے روایت کرتے ہیں، اس نے کہا: ”میں نے حضرت عائشہ رضی اللہ عنہا سے عرض کیا: ”مجھے رسول اللہ صلی اللہ علیہ وسلم کے اخلاق کے بارے میں بتائیے۔“ انہوں نے فرمایا: ”کیا تو قرآن نہیں پڑھتا؟ (جس میں یہ ارشاد ہے:) ﴿وَإِنَّكَ لَعَلَىٰ خُلُقٍ عَظِيمٍ﴾ [سورة القلم: 4] ”آپ یقینا عظیم اخلاق کے حامل ہیں۔““ (اس کے بعد ام المؤمنین رضی اللہ عنہا نے) فرمایا: ”رسول اللہ صلی اللہ علیہ وسلم اپنے اصحاب کے ساتھ تشریف فرما تھے۔ میں نے آپ صلی اللہ علیہ وسلم کے لیے کھانا تیار کیا۔ حضرت حفصہ رضی اللہ عنہا نے بھی آپ صلی اللہ علیہ وسلم کے لیے کھانا تیار کیا۔ حضرت حفصہ رضی اللہ عنہا نے پہلے تیار کر لیا۔ میں نے خادمہ سے کہا: ”جا کر ان کا پیالہ الٹ دو۔“ حضرت حفصہ رضی اللہ عنہا ابھی پیالہ رسول اللہ صلی اللہ علیہ وسلم کے سامنے رکھنے کا ارادہ ہی کر رہی تھیں کہ خادمہ نے انہیں جا لیا اور پیالہ الٹ دیا۔ پیالہ (گر کر) ٹوٹ گیا اور کھانا بکھر گیا۔ رسول اللہ صلی اللہ علیہ وسلم نے پیالے کے ٹکڑے جمع کیے اور اس میں جو کھانا تھا وہ چمڑے کے دستر خوان پر جمع کیا اور سب نے کھایا، پھر رسول اللہ صلی اللہ علیہ وسلم نے میرا پیالہ حفصہ رضی اللہ عنہا کے ہاں بھیج دیا، اور وہ انہی کو دے دیا۔ اور فرمایا: ”اپنے برتن کی جگہ یہ برتن لے لو۔ اور اس میں جو کھانا ہے وہ بھی کھا لو۔“ (ام المؤمنین نے) فرمایا: ”مجھے رسول اللہ صلی اللہ علیہ وسلم کے چہرہ مبارک پر خفگی کے آثار نظر نہیں آئے۔““ [سنن ابن ماجه/كتاب الأحكام/حدیث: 2333]