حضرت انس بن مالک رضی اللہ عنہ سے روایت ہے، عرض کیا گیا: ”اے اللہ کے رسول صلی اللہ علیہ وسلم ! ہم (مسلمان) کب نیکی کا حکم دینا اور برائی سے منع کرنا چھوڑ بیٹھیں گے؟“ آپ صلی اللہ علیہ وسلم نے فرمایا: ”جب تمہارے اندر وہ (خرابیاں) ظاہر ہو جائیں جو تم سے پہلی قوموں میں ظاہر ہوئی تھیں۔“ ہم نے عرض کیا: ”اے اللہ کے رسول صلی اللہ علیہ وسلم ! ہم سے پہلی امتوں میں کیا ظاہر ہوا تھا؟“ آپ صلی اللہ علیہ وسلم نے فرمایا: ”حکومت کم عمر (یا بچگانہ ذہن رکھنے والے) افراد میں اور بے حیائی بڑوں میں (جوان تو بدکاری میں ملوث ہوں گے ہی، بوڑھے بھی باز نہیں آئیں گے) اور علم تمہارے ذلیل لوگوں میں۔“ حضرت زید بن یحییٰ رحمہ اللہ نے فرمایا: ”تمہارے ذلیل لوگوں میں علم ہونے کا مطلب یہ ہے کہ علم فاسق (اور بدکردار) لوگوں میں ہوگا (جو علم پر عمل نہیں کریں گے)۔“ [سنن ابن ماجه/كتاب الفتن/حدیث: 4015]