اردو حاشہ:
(1) تازہ اور خشک کھجور کی آپس میں خرید و فروخت ممنوع ہے کیونکہ تازہ کھجور خشک ہونے کے بعد کم ہو جائے گی اور ہم جنس چیز میں کمی بیشی جائز نہیں۔ ہاں بیع عرایا میں تازہ کھجور کا خشک کھجور کے ساتھ سودا کرنا درست ہے، اس لیے کہ اس میں فریقین، یعنی عطیہ دینے اور قبول کرنے والوں کے لیے مشکلات پیدا ہو جائیں گی کیونکہ عطیہ کرنے والے، عطیہ نہ کرنے پر مجبور ہو جائیں گے۔
(2) یہ حدیث اس بات پر دلالت کرتی ہے کہ جب ایک ہی جنس کا تازہ پھل خشک ہو کر وزن میں کم ہو جاتا ہو تو اس جنس کے خشک اور تر (تازہ) پھل کی باہمی بیع حرام ہے اگر چہ سودا کرتے وقت دونوں (پھل) وزن اور کیل (ماپ) میں برابر ہی ہوں۔ اس کی وجہ یہ کہ ہے تساوی، یعنی باہمی برابری کا اعتبار اس وقت معبتر اور صحیح ہوتا ہے جب وہ اشیاء حالت کمال کو پہنچ کر بھی برابر ہی رہیں اور ادھر یہ بات نہیں کیونکہ کھجور جب خشک ہو جاتی ہے تو اس کا وزن بہر صورت تازہ حالت کی نسبت کم ہو جاتا ہے اور پھر اس کا تعین بھی نا ممکن ہے کہ وزن کتنا کم ہوتا ہے، البتہ امام ابو حنیفہ رحمہ اللہ وزن اور ماپ برابر برابر ہونے کی صورت میں خشک اور تازہ کھجور کے باہمی سودے کو جائز قرار دیتے ہیں جبکہ صاحبین (امام صاحب کے شاگردان امام محمد بن حسن اور امام ابو یوسف اس مسئلے میں اپنے استاد محترم کی مخالفت کرتے ہیں اور اس مسئلے میں مما نعت کی بابت وارد صحیح احادیث کی بنیاد پر انھوں نے حدیث رسول کو قبول اور اپنے استاد صاحب کی بات کو رد کر دیا ہے۔ مزید تفصیل کے لیے دیکھیے: (ذخيرة العقبى شرح سنن النسائي للأتيوبي:275/34)
(3) اس قسم کی بیع کو مزابنہ کہا جاتا ہے۔ یہ عموماََ تو منع ہے مگر عریہ (عطیہ میں دیے گئے درخت) میں غرباء کی سہولت کے لیے رخصت دی گئی ہے جیسا کہ تفصیل فائدہ نمبرا میں بیان ہو چکی ہے۔
(مزید تفصیل کے لیے دیکھیے حدیث نمبر: 3910)