1

فوائد ومسائل:
(۱)عمر رسیدہ اور بوڑھے مسلمان کی تعظیم و توقیر کرنا کہ اس کے ساتھ عزت سے پیش آنا اور مجلس وغیرہ میں جگہ دینا اور اس کی بات سننا اللہ تعالیٰ کی تعظیم کرنا ہے کیونکہ اس کی عزت کا حکم اللہ تعالیٰ نے دیا ہے اور اللہ تعالیٰ کے ہاں بھی اس کی عزت و تکریم ہے۔
(۲) قرآن مجید کے قاری اور حافظ و عالم کو حامل قرآن کہا گیا ہے کیونکہ وہ اس کے حصول کے لیے بہت زیادہ مشقت برداشت کرتا ہے لیکن اس کے ساتھ دو شرطیں عائد کر دیں کہ ایک تو وہ غلو کرنے والا نہ ہو۔ قرآن میں غلو یہ ہوسکتا ہے کہ وہ اسے اس قدر زیادہ پڑھتا ہے کہ دیگر فرائض کو اس کی وجہ سے ترک کر دیتا ہے یا پھر زندگی کے دیگر معاملات میں غلو کرتا ہے جو قرآن کی تعلیم کے منافي ہے کیونکہ اس میں میانہ روی کا حکم ہے۔ یا پھر تجوید میں غلو مراد ہے کہ اس میں تدبیر اور قرآن کے مقصد کو بھول ہی جاتا ہے۔ اور جفایہ ہے کہ اسے پڑھنا چھوڑ دے یا پڑھ کر بھلا دے یا پھر ا س سے عملی راہنمائی نہ لے۔ مختصر یہ کہ جو عالم قرآن کے حوالے سے افراط و تفریط کا شکار نہ ہو اس کی تکریم بھی ضروری ہے۔
(۳) انصاف پسند اور عادل حکمران کی عزت و تکریم کرنا اور اس کی نصرت و تائید کرنا فرض ہے اور جو انصاف پسند حاکم کی اہانت کرے، وہ بہت بڑا مجرم ہے جو اللہ تعالیٰ کے احکام کی توہین کرتا ہے۔