1

فوائد ومسائل:
(۱)یہ حدیث قدسی ہے، حدیث کی صورت میں جو بات رسول اکرم صلی اللہ علیہ وسلم اللہ تعالیٰ سے بیان کریں اسے حدیث قدسی کہتے ہیں۔ اس کے الفاظ بھی اللہ کی طرف سے ہوتے ہیں جنہیں رسول اللہ صلی اللہ علیہ وسلم بیان کرتے ہیں۔ دیگر احادیث کا مفہوم تو اللہ تعالیٰ کا القا کردہ ہوتا ہے لیکن الفاظ رسول اکرم صلی اللہ علیہ وسلم کے ہوتے ہیں۔ قرآن اور حدیث قدسی میں فرق یہ ہے کہ قرآن کے نزول کا ذریعہ وحی جلی ہے جبکہ حدیث قدسی میں ایسا نہیں ہے۔
(۲) اس سے صلہ رحمی کی فضیلت ثابت ہوتی ہے کہ جو شخص اس کے حقوق کا خیال رکھے گا اللہ تعالیٰ بھی اسے نوازے گا اور اسے پورا پورا ثواب دے گا، قطع رحمی کرنے والا شخص رحمت باری سے محروم ہو جائے گا۔
(۳) انسان کی فطرت ہے کہ وہ دوسروں سے فائدہ حاصل کرنا چاہتا ہے لیکن خود دوسروں کو فائدہ پہنچانے کا نہیں سوچتا۔ اسلام نے خود غرضی کی اس فکر کو ختم کیا ہے اور مسلمانوں کو حکم دیا ہے کہ وہ ان دنیاوی مفادات سے بالاتر ہو کر سب سے بڑے اخروی فائدے کے لیے قربانی دیں۔ نظام دنیا تبھی درست چلے گا۔ کائنات کی بقا اسی میں ہے کہ ایک زیادتی کرے تو دوسرا برداشت اور صبر کا مظاہرہ کرے۔ ورنہ اگر ہر ایک اپنے حقوق کے نام پر کھینچا تانی کرے گا تو بہت جلد یہ نظام بگڑ جائے گا۔ عام لوگوں کی نسبت رشتہ داروں سے زیادہ واسطہ پڑتا ہے، اس لیے بگاڑ اور قطع تعلقی کے امکانات بھی زیادہ ہوتے ہیں۔ شریعت نے انہی خطرات کے پیش نظر اس بارے میں زیادہ محتاط رہنے کا حکم دیا ہے۔ عظم الجزاء مع عظم البلاء (جتنی آزمائش زیادہ ہوگی اجر بھی اسی قدر زیادہ ہوگا)کے قاعدے کے مطابق اس کا اجر بھی بہت زیادہ رکھا ہے، اور وہ ہے اللہ تعالیٰ کا خصوصی فضل و کرم۔