سیدنا ابوہریرہ رضی اللہ عنہ نے رسول اللہ صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”موسیٰ علیہ السلام بڑے ہی شرم والے اور بدن ڈھانپنے والے تھے، ان کے حیا کی وجہ سے ان کے جسم کا کوئی حصہ نہیں دیکھا جا سکتا تھا، بنی اسرائیل کے بعض افراد نے انہیں اذیت پہنچائی تو انہوں نے کہا: اس حد تک بدن چھپانا صرف اس لیے ہے کہ ان کے جسم میں کوئی عیب ہے یا کوڑھ ہے یا ان کے فوطے بڑھے ہوئے ہیں یا پھر کوئی اور بیماری ہے، پس وہ نہانے لگے اور اپنے کپڑے پتھر پر رکھ دئیے، تو پتھر ان کے کپڑے لے کر بھاگ پڑا، وہ (موسیٰ علیہ السلام) بھی اس کے پیچھے دوڑ پڑے، بنو اسرائیل نے انہیں (ننگا) دیکھ لیا کہ ۔۔۔۔ (مکمل حدیث اس نمبر پر پڑھیے۔) [مسند اسحاق بن راهويه/حدیث:87]

فوائد:
مذکورہ حدیث سے معلوم ہوا کہ برہنہ حالت میں غسل کرنا جائز ہے جیسا کہ سیدنا موسیٰ علیہ السلام نے غسل کیا اور پیچھے گزرا ہے کہ سیدنا ایوب علیہ السلام نے بھی کیا، لیکن سوال یہ پیدا ہوتا ہے کہ یہ پہلی امتوں کی بات ہے۔ تو پہلی شریعتیں ہمارے لیے حجت ہیں۔ لیکن پہلی امتوں کے جو امور قرآن پاک نے منسوخ ٹھہرائے یا اللہ کے رسول صلی اللہ علیہ وسلم کی کوئی واضح حدیث ملتی ہے جو ان کی شریعت کے متعارض ہے تو وہ ہمارے لیے حجت نہیں ہیں۔ اور سیدنا موسیٰ علیہ السلام کے مذکورہ واقعہ سے یہ بات ثابت ہوتی ہے کہ برہنہ حالت میں لوگوں سے مخفی ہو کر نہانا چاہیے نہ کہ لوگوں کے سامنے۔ لوگوں کے سامنے بے لباس ہو کر نہانا جائز نہیں ہے۔ جیسا کہ سیدنا یعلی بن امیہ رضی اللہ عنہ سے روایت ہے رسول اللہ صلی اللہ علیہ وسلم نے ایک آدمی کو دیکھا وہ ایک کھلی جگہ میں کپڑا باندھے بغیر نہا رہا تھا تو آپ منبر پر چڑھے اور اللہ عزوجل کی حمدوثناء بیان کی پھر فرمایا: ”اللہ عزوجل انتہائی حیا والا اور پردہ پوش ہے، حیا اور پردہ پوشی کو پسند کرتا ہے سو تم میں سے جب کوئی غسل کرنے لگے تو پردہ کرے۔“ (سنن ابي داود، رقم: 4012 اسنادہ صحیح)
سیدنا موسیٰ علیہ السلام کی شریعت میں بھی ایک ساتھ غسل کرنا ایک دوسرے کے ساتھ برہنہ حالت میں غسل کرنا حرام تھا، لیکن بنی اسرائیل نے سیدنا موسیٰ علیہ السلام کی مخالفت کرتے ہوئے اس غیر شرعی فعل کا ارتکاب کیا اور اس کے علاوہ وہ اکثر امور میں شریعت موسوی سے اپنی سرکشی ونافرمانی کی بنیاد پر دور رہتے تھے۔ (ارشاد الساری: 1؍ 331۔ عمدۃ القاری: 1؍ 386)
پتھر کا کپڑے لے کر بھاگنے سے سیدنا موسیٰ علیہ السلام کا معجزہ ثابت ہوتا ہے۔ سوال پیدا ہوتا ہے کہ ایسا کیوں ہوا؟ اس کا جواب یہ ہے کہ پیغمبر پر الزام لگا تو اللہ ذوالجلال نے اپنے پیغمبر پر اس الزام اور عیب کو دور کرنے کے لیے ایسا کروایا۔ حدیث کے آخر میں جو آیت مبارکہ ہے اس میں ایمان والوں کو سمجھایا جا رہا ہے کہ تم اپنے پیغمبر صلی اللہ علیہ وسلم کو بنی اسرائیل کی طرح ایذا مت دینا۔ جیسا کہ ایک موقع پر مال غنیمت کی تقسیم میں ایک شخص نے کہا کہ اس میں عدل وانصاف سے کام نہیں لیا گیا۔ جب نبی معظم صلی اللہ علیہ وسلم تک یہ بات پہنچی تو آپ علیہ السلام غضبناک ہوئے حتیٰ کہ آپ صلی اللہ علیہ وسلم کا چہرہ انور سرخ ہوگیا آپ صلی اللہ علیہ وسلم نے فرمایا: ”موسیٰ علیہ السلام پر اللہ کی رحمت ہو، انہیں اس سے کہیں زیادہ ایذا پہنچائی گئی۔ لیکن انہوں نے صبر کیا۔ (مسلم، کتاب الزکاة، باب اعطاء المولفۃ قلوبهم علی الاسلام الخ)