سیدہ اسماء بنت یزید رضی اللہ عنہا نے رسول اللہ صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”دجال زمین پر چالیس سال رہے گا، سال مہینے کی طرح، مہینہ جمعہ کی طرح، جمعہ دن کی طرح اور دن آگ میں شعلے کی مانند ہوگا۔“
[مسند اسحاق بن راهويه/حدیث:871]

فوائد:
مذکورہ روایات ضعیف ہیں، البتہ صحیح حدیث سے ثابت ہے کہ چالیس دن رہے گا، جیسا کہ سیّدنا نواس بن سمعان رضی اللہ عنہ کہتے ہیں: ایک روز رسول اللہ صلی اللہ علیہ وسلم نے دجال کا ذکر فرمایا اور نصیحت فرمائی: ”اے اللہ کے بندو! ثابت قدم رہنا“ ہم نے عرض کیا: دجال کتنی مدت تک زمین میں رہے گا؟ آپ صلی اللہ علیہ وسلم نے ارشاد فرمایا: ”چالیس روز جن میں سے پہلا دن ایک سال کے برابر ہوگا۔ دوسرا دن ایک مہینہ کے برابر ہو گا اور تیسر اروزہ ہفتہ کے برابر ہوگا اور اس کے بعد 37 روز تمہارے شب وروز کے برابر ہوں گے۔ “
ہم نے عرض کیا: یا رسول اللہ صلی اللہ علیہ وسلم! پہلا دن جو سال کے برابرہوگا اس میں ایک دن کی (پانچ) نمازیں ہی کافی ہوں گی؟ آپ صلی اللہ علیہ وسلم نے ارشاد فرمایا: ”نہیں، اپنے روز وشب کا اندازہ کرکے (سال بھر کی) نمازیں پڑھنا۔ “(مسلم، کتاب الفتن، باب ذکر الدجال، رقم: 2937۔ سنن ابي داود، کتاب الملاحم، رقم: 4321)