´اولاد آدم کا بیان`
«. . . ‏‏‏‏وَعَنْ أَبِي هُرَيْرَةَ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «لَمَّا خَلَقَ اللَّهُ آدم مسح ظَهره فَسقط من ظَهْرِهِ كُلُّ نَسَمَةٍ هُوَ خَالِقُهَا مِنْ ذُرِّيَّتِهِ إِلَى يَوْمِ الْقِيَامَةِ وَجَعَلَ بَيْنَ عَيْنَيْ كُلِّ إِنْسَانٍ مِنْهُمْ وَبِيصًا مِنْ نُورٍ ثُمَّ عَرَضَهُمْ عَلَى آدَمَ فَقَالَ أَيْ رَبِّ مَنْ هَؤُلَاءِ قَالَ هَؤُلَاءِ ذُرِّيَّتُكَ فَرَأَى رَجُلًا مِنْهُمْ فَأَعْجَبَهُ وَبِيصُ مَا بَين عَيْنَيْهِ فَقَالَ أَي رب من هَذَا فَقَالَ هَذَا رجل من آخر الْأُمَم من ذريتك يُقَال لَهُ دَاوُدُ فَقَالَ رَبِّ كَمْ جَعَلْتَ عُمُرَهُ قَالَ سِتِّينَ سنة قَالَ أَي رب زده من عمري أَرْبَعِينَ سنة فَلَمَّا قضي عمر آدم جَاءَهُ ملك الْمَوْت فَقَالَ أَوَلَمْ يَبْقَ مِنْ عُمُرِي أَرْبَعُونَ سَنَةً قَالَ أولم تعطها ابْنك دَاوُد قَالَ فَجحد آدم فَجحدت ذُريَّته وَنسي آدم فنسيت ذُريَّته وخطئ آدم فخطئت ذُريَّته» . رَوَاهُ التِّرْمِذِيّ . . .»
”. . . سیدنا ابوہریرہ رضی اللہ عنہ سے مروی ہے انہوں نے کہا کہ رسول اللہ صلی اللہ علیہ وسلم نے فرمایا: جب اللہ تعالیٰ نے آدم کو پیدا کیا تو ان کی پشت پر اپنا ہاتھ پھیرا۔ ان کی پیٹھ سے تمام وہ جانیں نکل پڑیں جن کو ان کی اولاد سے قیامت تک پیدا کرنے والا تھا پھر ان میں سے ہر ایک انسان کے دونوں آنکھوں کے درمیان نور کی چمک پیدا کر دی پھر ان سب کو آدم کے سامنے پیش کیا۔ آدم علیہ السلام نے عرض کیا: اے پروردگار! یہ کون لوگ ہیں اللہ تعالیٰ نے فرمایا: یہ سب تیری اولاد ہیں۔ آدم علیہ السلام نے ان میں سے ایک شخص کو دیکھا اور اس کی دونوں انکھوں کے درمیان کی چمک کو دیکھ کر بہت خوش ہوئے تو اللہ تعالیٰ سے پوچھا یہ شخص کون ہے۔ تو اللہ تعالیٰ نے فرمایا: یہ تمہارے بیٹے داؤد ہیں، آدم علیہ السلام نے کہا: اے میرے رب! ان کی کتنی عمر مقرر کی ہے؟ اللہ تعالیٰ نے فرمایا: ساٹھ برس کی۔ آدم علیہ السلام نے فرمایا کہ اے میرے رب! میری عمر سے ان کی عمر میں چالیس برس اور بڑھا دے۔ رسول اللہ صلی اللہ علیہ وسلم نے فرمایا: جب آدم علیہ السلام کی عمر ختم ہو چکی مگر چالیس سال (یعنی ان کی عمر میں سے چالیس سال) باقی رہ گئے تو موت کا فرشتہ ان کے پاس آیا تو آدم علیہ السلام نے فرمایا کہ میری عمر میں سے ابھی چالیس سال باقی نہیں رہے؟ موت کے فرشتہ نے کہا کہ کیا آپ نے اپنی عمر میں سے اپنے بیٹے داؤد کو چالیس سال نہیں دئیے تھے؟ پس آدم علیہ السلام نے اس سے انکار کر دیا تو ان کی اولاد بھی انکار کرتی ہے اور وہ بھول گئے (یعنی ممنوع درخت کے پھل کو کھا لیا) تو ان کی الاد بھی بھولتی ہے اور خطا کرتی ہے۔ اس حدیث کو ترمذی نے روایت کیا ہے۔ . . .“ [مشكوة المصابيح/كِتَاب الْإِيمَانِ: 118]

تحقیق الحدیث:
اس روایت کی سند حسن ہے۔ اسے حاکم نے بھی صحیح کہا ہے۔ [حاکم 586/2]

فقہ الحدیث:
➊ اس روایت میں نور سے مراد ایمان کا نور اور فطرت سلیمہ ہے۔
➋ بھول جانا انسانی فطرت میں شامل ہے۔
➌ یہ حدیث سورۃ الاعراف کی آیت: 172 کی شرح میں ہے۔
➍ سیدنا داؤد علیہ السلام بہت خوبصورت تھے۔
➎ ہر جاندار کی عمر اتنی ہوتی ہے جتنی اس کی تقدیر میں لکھی ہوئی ہے اور جب موت کا مقرر وقت آتا ہے تو پھر اسے کوئی چیز ٹال نہیں سکتی۔
➏ لمبی زندگی سے محبت فطرت انسانی میں شامل ہے۔
➐ سیدنا آدم علیہ السلام کے زمانے سے لے کر قیامت تک جتنے بھی انسان ہیں وہ سب کے سب آدم علیہ السلام اور حوا علیہ السلام کی اولاد ہیں یعنی سیدنا آدم علیہ السلام تمام انسانوں کے باپ ہیں۔