حضرت ابو سعید خدری رضی اللہ عنہ سے روایت ہے، انہوں نے فرمایا کہ جب بنو قریظہ حضرت سعد بن معاذ رضی اللہ عنہ کی ثالثی پر ہتھیار ڈال کر قلعے سے اتر آئے تو رسول اللہ صلی اللہ علیہ وسلم نے انہیں پیغام بھیجا، حضرت سعد بن معاذ رضی اللہ عنہ وہیں قریب ہی ایک مقام پر پڑاؤ کیے ہوئے تھے، وہ گدھے پر (سوار ہو کر) تشریف لائے، جب قریب آئے تو رسول اللہ صلی اللہ علیہ وسلم نے فرمایا: ”اپنے سردار کے استقبال کے لیے اٹھو“ چنانچہ وہ آئے اور رسول اللہ صلی اللہ علیہ وسلم کے قریب آکر بیٹھ گئے، آپ صلی اللہ علیہ وسلم نے ان سے فرمایا: ”ان لوگوں (یہودِ بنو قریظہ) نے آپ کی ثالثی پر ہتھیار ڈال دیے ہیں۔“ حضرت سعد بن معاذ رضی اللہ عنہ نے یہ فیصلہ دیا کہ ان میں جو جنگجو ہیں انہیں قتل کر دیا جائے اور ان کی عورتوں اور بچوں کو غلام بنا لیا جائے، آپ صلی اللہ علیہ وسلم نے فرمایا: ”تم نے اللہ کے حکم کے مطابق فیصلہ کیا ہے۔“ [صحيح البخاري/كتاب الجهاد والسير/حدیث: 3043]

حضرت عائشہ رضی اللہ عنہا سے روایت ہے، انہوں نے فرمایا: جنگ خندق کے موقع پر حضرت سعد بن معاذ رضی اللہ عنہ کے ہاتھ کی رگ (ہفت اندام) میں تیر لگ گیا تو نبی صلی اللہ علیہ وسلم نے ان کے لیے مسجد میں ایک خیمہ لگا دیا تاکہ نزدیک سے ان کی عیادت کر لیا کریں اور مسجد میں بنو غفار کا خیمہ بھی تھا۔ پھر اچانک ان کی طرف خون بہہ کر آنے لگا تو لوگ اس سے خوفزدہ ہوئے، کہنے لگے: اے خیمے والو! یہ کیا ہے جو تمہاری طرف سے ہمارے پاس آ رہا ہے؟ دیکھا تو حضرت سعد رضی اللہ عنہ کے زخم سے خون بہہ رہا تھا، چنانچہ وہ اسی زخم سے فوت ہو گئے۔ [صحيح البخاري/كتاب الجهاد والسير/حدیث: 463]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم جب غزوہ خندق سے واپس ہوئے تو آپ نے ہتھیار اتارے اور غسل فرمایا۔ اس وقت جبریل علیہ السلام آپ کے پاس تشریف لائے جبکہ ان کا سر گردوغبار سے اٹا ہوا تھا، انہوں نے کہا: آپ نے ہتھیار اتار دیے ہیں؟ لیکن اللہ کی قسم! میں نے تو ابھی تک نہیں اتارے۔ رسول اللہ صلی اللہ علیہ وسلم نے فرمایا: ”پھر تمہارا کہاں کا پروگرام ہے؟“ انہوں نے کہا کہ اس طرف اور بنو قریظہ کی طرف اشارہ کیا۔ حضرت عائشہ رضی اللہ عنہا کا بیان ہے کہ رسول اللہ صلی اللہ علیہ وسلم اسی وقت ان کی طرف روانہ ہو گئے۔ [صحيح البخاري/كتاب الجهاد والسير/حدیث: 2813]

حضرت ابوسعید خدری رضی اللہ عنہ سے روایت ہے کہ (بنو قریظہ کے) لوگ حضرت سعد بن معاذ رضی اللہ عنہ کے فیصلے پر راضی ہو گئے تو آپ صلی اللہ علیہ وسلم نے فرمایا: ” «قُومُوا إِلَىٰ سَيِّدِكُمْ أَوْ خَيْرِكُمْ» اپنے میں سے بہتر یا اپنے سردار کے استقبال کے لیے آگے بڑھو۔“ اور فرمایا: ”اے سعد! ان لوگوں نے تمہارا فیصلہ منظور کر لیا ہے۔“ انہوں نے کہا: ”میں ان کے متعلق فیصلہ دیتا ہوں کہ ان میں سے لڑنے والوں کو قتل کر دیا جائے اور ان کی عورتوں اور بچوں کو قیدی بنا لیا جائے۔“ آپ صلی اللہ علیہ وسلم نے فرمایا: ” «لَقَدْ حَكَمْتَ فِيهِمْ بِحُكْمِ الْمَلِكِ» اے سعد! تو نے اللہ کے حکم کے مطابق، یا (آپ نے فرمایا) بادشاہ کے حکم کے مطابق فیصلہ دیا ہے۔“ [صحيح البخاري/كتاب الجهاد والسير/حدیث: 3804]

حضرت ابو سعید خدری رضی اللہ عنہ سے روایت ہے، انہوں نے کہا: بنو قریظہ حضرت سعد بن معاذ رضی اللہ عنہ کے فیصلے کو تسلیم کرتے ہوئے قلعے سے نیچے اترے۔ نبی صلی اللہ علیہ وسلم نے حضرت سعد رضی اللہ عنہ کو پیغام بھیجا تو وہ گدھے پر سوار ہو کر آئے۔ جب وہ مسجد کے قریب آئے تو نبی صلی اللہ علیہ وسلم نے انصار سے فرمایا: ”اپنے سردار یا افضل کی طرف آگے بڑھو۔“ اس کے بعد آپ صلی اللہ علیہ وسلم نے ان سے فرمایا: ”بنو قریظہ نے تمہیں ثالث مان کر ہتھیار ڈال دیے ہیں۔“ چنانچہ انہوں نے یہ فیصلہ دیا کہ ان میں سے جنگجو لوگوں کو قتل کر دیا جائے اور ان کے بچوں اور عورتوں کو قیدی بنا لیا جائے۔ (اس پر) آپ صلی اللہ علیہ وسلم نے فرمایا: ”آپ نے اللہ کے فیصلے کے مطابق فیصلہ کیا۔“ یا اس طرح فرمایا: ”تو نے بادشاہانہ فیصلہ دیا۔“ [صحيح البخاري/كتاب الجهاد والسير/حدیث: 4121]

حضرت عائشہ رضی اللہ عنہا سے روایت ہے، انہوں نے فرمایا: ”غزوہ خندق کے موقع پر حضرت سعد رضی اللہ عنہ زخمی ہو گئے تھے۔ قریش کے ایک حبان بن عرقہ نامی شخص (جس کا اصل نام حبان بن قیس تھا اور وہ بنو معیص بن عامر بن لؤی کے قبیلے سے تھا) نے انہیں تیر مارا جو ان کے بازو کی رگ میں لگا تھا۔ نبی صلی اللہ علیہ وسلم نے مسجد میں ان کا خیمہ نصب کرایا تھا تاکہ قریب سے ان کی بیمار پرسی کر لیا کریں۔ جب رسول اللہ صلی اللہ علیہ وسلم غزوہ خندق سے واپس لوٹے، ہتھیار اتار دیے اور غسل فرما لیا تو حضرت جبریل علیہ السلام حاضر ہوئے جبکہ وہ اپنے سر سے غبار جھاڑ رہے تھے، انہوں نے رسول اللہ صلی اللہ علیہ وسلم سے کہا: ”آپ نے تو ہتھیار اتار دیے ہیں، اللہ کی قسم! میں نے ابھی نہیں اتارے۔ آپ ان کی طرف چلیں۔“ نبی صلی اللہ علیہ وسلم نے فرمایا: ”کدھر؟“ تو انہوں نے بنو قریظہ کی طرف اشارہ کیا۔ رسول اللہ صلی اللہ علیہ وسلم نے بنو قریظہ پر چڑھائی کی تو انہوں نے آپ کا فیصلہ قبول کر لیا، لیکن آپ نے ان کا فیصلہ حضرت سعد بن معاذ رضی اللہ عنہ کے حوالے کر دیا۔ حضرت سعد رضی اللہ عنہ نے کہا: ”میں تو ان کے متعلق یہ فیصلہ دیتا ہوں کہ ان میں سے جنگجو لوگ قتل کر دیے جائیں، ان کی عورتیں اور بچے قیدی بنا لیے جائیں اور ان کا مال و دولت تقسیم کر دیا جائے۔“ (راوی حدیث) ہشام نے کہا: مجھے میرے والد گرامی (حضرت عروہ رضی اللہ عنہ) نے حضرت عائشہ رضی اللہ عنہا سے روایت بیان کی کہ حضرت سعد رضی اللہ عنہ نے یہ دعا کی تھی: ”اے اللہ! تجھے بخوبی علم ہے کہ مجھے اس سے زیادہ کوئی چیز عزیز نہیں کہ میں تیرے راستے میں اس قوم سے جہاد کروں جس نے تیرے رسول صلی اللہ علیہ وسلم کو جھٹلایا اور انہیں (ان کے وطن سے) نکلنے پر مجبور کر دیا، لیکن مجھے ایسا معلوم ہوتا ہے کہ تو نے ہماری اور ان کی لڑائی کو ختم کر دیا ہے، لہذا اگر ان سے جنگ کا کوئی حصہ باقی ہے تو مجھے زندگی عطا فرما تاکہ میں تیری رضا کے لیے ان سے جنگ کروں، لیکن اگر تو نے لڑائی کے سلسلے کو ختم ہی کر دیا ہے تو میرے اس زخم کو پھر سے ہرا کر دے اور اسی وجہ سے میری موت واقع کر دے۔“ اس دعا کے بعد ان کے سینے سے خون جاری ہو گیا۔ مسجد میں قبیلہ بنو غفار کا خیمہ بھی تھا۔ جب خون ان کی طرف بہتا ہوا آیا تو وہ گھبرائے اور انہوں نے کہا: ”اے خیمے والو! تمہاری طرف سے یہ خون ہماری طرف کیوں بہہ کر آ رہا ہے؟“ جب دیکھا تو حضرت سعد رضی اللہ عنہ کے زخم سے خون بہہ رہا تھا۔ اسی زخم سے ان کی شہادت واقع ہوئی۔“ [صحيح البخاري/كتاب الجهاد والسير/حدیث: 4122]

حضرت ابو سعید خدری رضی اللہ عنہ سے روایت ہے کہ اہل قریظہ، حضرت سعد بن معاذ رضی اللہ عنہ کو ثالث بنانے پر تیار ہو گئے تو نبی صلی اللہ علیہ وسلم نے انہیں پیغام بھیجا۔ جب وہ آئے تو آپ صلی اللہ علیہ وسلم نے فرمایا: ”اپنے سردار یا اپنی بہتر شخصیت کو لینے کے لیے اٹھو۔“ بہرحال وہ نبی صلی اللہ علیہ وسلم کے پاس بیٹھ گئے۔ آپ صلی اللہ علیہ وسلم نے فرمایا: ”یہ لوگ (بنو قریظہ کے یہودی) تمہارے فیصلے پر راضی ہو کر قلعے سے اتر آئے ہیں۔“ حضرت سعد بن معاذ رضی اللہ عنہ نے کہا: ”میں یہ فیصلہ دیتا ہوں کہ ان میں سے جو جنگجو ہیں انہیں قتل کر دیا جائے اور ان کے بچوں اور عورتوں کو قیدی بنا لیا جائے۔“ آپ صلی اللہ علیہ وسلم نے فرمایا: ”آپ نے وہی فیصلہ کیا ہے جو اللہ تعالیٰ نے کیا تھا۔“ ابو عبداللہ (امام بخاری رحمہ اللہ) نے کہا: ”میرے بعض ساتھیوں نے ابوالولید کے واسطے سے حضرت ابو سعید خدری رضی اللہ عنہ کے قول سے «إِلٰی حُكْمِكَ» تک بیان کیا ہے یعنی شروع سے لے کر «إِلٰی حُكْمِكَ» تک روایت نقل کی ہے، بعد والا حصہ نہیں کیا گیا۔“ [صحيح البخاري/كتاب الجهاد والسير/حدیث: 6262]