حضرت انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم کا پیالہ ٹوٹ گیا تو آپ نے ٹوٹی ہوئی جگہ پر چاندی کی تار لگا کر اسے جوڑ لیا تھا۔ (راوی حدیث) حضرت عاصم رحمہ اللہ کہتے ہیں کہ میں نے وہ پیالہ دیکھا اور اس میں پانی بھی پیا ہے۔ [صحيح البخاري/كتاب فرض الخمس/حدیث: 3109]

حضرت عاصم احول رحمہ اللہ سے روایت ہے، انہوں نے کہا: ”میں نے حضرت انس بن مالک رضی اللہ عنہ کے پاس نبی صلی اللہ علیہ وسلم کا پیالہ دیکھا جو ٹوٹ گیا تھا، تو حضرت انس رضی اللہ عنہ نے اسے چاندی کے تار سے جوڑ دیا۔“ حضرت عاصم رحمہ اللہ نے کہا: ”وہ پیالہ عمدہ، فراخ اور نضار کے درخت سے بنا ہوا تھا۔“ حضرت انس رضی اللہ عنہ بیان کرتے ہیں: ”میں نے متعدد دفعہ اس سے رسول اللہ صلی اللہ علیہ وسلم کو پانی پلایا تھا۔“ ابن سیرین رحمہ اللہ کہتے ہیں: ”اس پیالے میں لوہے کا ایک حلقہ تھا، حضرت انس رضی اللہ عنہ نے چاہا کہ اس کی جگہ سونے یا چاندی کا حلقہ لگا دیں، تو ابو طلحہ رضی اللہ عنہ نے ان سے فرمایا: ”جس چیز کو رسول اللہ صلی اللہ علیہ وسلم نے برقرار رکھا ہے، اس میں کسی قسم کی تبدیلی نہ کریں“، پھر انہوں نے اپنا یہ ارادہ ترک کر دیا۔“ [صحيح البخاري/كتاب فرض الخمس/حدیث: 5638]