حضرت عائشہ رضی اللہ عنہا سے روایت ہے کہ نبی صلی اللہ علیہ وسلم نے ایک دفعہ منقش چادر میں نماز پڑھی، آپ صلی اللہ علیہ وسلم کی ایک نظر اس کے نقش و نگار پر پڑی تو آپ صلی اللہ علیہ وسلم نے نماز سے فراغت کے بعد فرمایا: ”میری اس چادر کو ابوجہم کے پاس واپس لے جاؤ اور ابوجہم سے اس کی انبجانی (سادہ) چادر لے آؤ کیونکہ اس منقش چادر نے مجھے ابھی اپنی نماز میں دوسری طرف متوجہ کر دیا تھا۔“ ہشام بن عروہ نے اپنے باپ عروہ رحمہ اللہ سے اور وہ حضرت عائشہ رضی اللہ عنہا سے بیان کرتے ہیں کہ نبی صلی اللہ علیہ وسلم نے فرمایا: ”میں نے اس چادر کے نقش و نگار کی طرف بحالتِ نماز نظر کی تو مجھے اندیشہ ہوا کہ کہیں یہ مجھے فتنے میں نہ ڈال دے۔“ [صحيح البخاري/كتاب الصلاة/حدیث: 373]

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم نے ایک مرتبہ ایسی چادر پہن کر نماز پڑھی جس پر کچھ نقوش تھے۔ فراغت کے بعد آپ صلی اللہ علیہ وسلم نے فرمایا: ”مجھے اس چادر کے نقش و نگار نے نماز سے غافل کر دیا تھا، اسے ابوجہم کے پاس لے جاؤ اور مجھے سادہ چادر لا دو۔“ [صحيح البخاري/كتاب الصلاة/حدیث: 752]

حضرت عائشہ رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم نے اپنی ایک منقش چادر میں نماز پڑھی، آپ صلی اللہ علیہ وسلم نے (دورانِ نماز میں ہی) اس کے نقش و نگار پر ایک نظر ڈالی۔ پھر جب آپ صلی اللہ علیہ وسلم نے سلام پھیرا تو فرمایا: ”میری اس منقش چادر کو ابوجہم کے پاس لے جاؤ اور اسے واپس کر دو، کیونکہ اس نے ابھی مجھے میری نماز سے غافل کر دیا تھا، اور وہاں سے ابوجہم کی سادہ چادر لے آؤ۔“ یہ ابوجہم بن حذیفہ بن غانم، عدی بن کعب کے قبیلے سے تھے۔ [صحيح البخاري/كتاب الصلاة/حدیث: 5817]