حضرت موسیٰ بن عقبہ رحمہ اللہ کہتے ہیں: میں نے حضرت سالم بن عبداللہ رحمہ اللہ کو دیکھا کہ وہ (مکے سے مدینے کے) راستے پر بعض مخصوص مقامات کو تلاش کر کے وہاں نماز پڑھتے تھے اور بیان کرتے تھے کہ ان کے والد گرامی (حضرت عبداللہ بن عمر رضی اللہ عنہما) ان مقامات پر نماز پڑھا کرتے تھے اور انہوں نے نبی صلی اللہ علیہ وسلم کو ان جگہوں میں نماز پڑھتے ہوئے دیکھا تھا۔ موسیٰ بن عقبہ رحمہ اللہ کہتے ہیں: مجھ سے حضرت نافع رحمہ اللہ نے بھی بیان کیا کہ حضرت عبداللہ بن عمر رضی اللہ عنہما ان مقامات پر نماز پڑھتے تھے۔ اور میں نے اس سلسلے میں حضرت سالم رحمہ اللہ سے معلوم کیا تو انہوں نے بھی وہی مقامات بتائے جن کی نشاندہی حضرت نافع رحمہ اللہ نے کی تھی، البتہ شرف الروحاء کی مسجد کے متعلق دونوں کا کچھ اختلاف تھا۔ [صحيح البخاري/كتاب الصلاة/حدیث: 483]

حضرت ابن عمر رضی اللہ عنہما سے روایت ہے کہ نبی صلی اللہ علیہ وسلم کو ایک خواب دکھایا گیا جبکہ آپ ذوالحلیفہ کی ایک وادی (عقیق) کے درمیان رات کا پڑاؤ کیے ہوئے تھے۔ آپ سے کہا گیا: ”آپ اس وقت ایک بابرکت میدان میں ہیں۔“ راوی حدیث کہتا ہے کہ حضرت سالم بن عبداللہ رحمہ اللہ نے ہمیں اسی مقام پر ٹھہرایا۔ وہ اسی جگہ کو تلاش کرتے جہاں حضرت عبداللہ بن عمر رضی اللہ عنہما اونٹ بٹھایا کرتے تھے اور وہ بھی رسول اللہ صلی اللہ علیہ وسلم کے پڑاؤ کا قصد کرتے تھے، بطن وادی میں وہ مقام مسجد کی نچلی جانب ہے، یعنی پڑاؤ کرنے والوں اور راستے کے درمیان میں واقع ہے۔ [صحيح البخاري/كتاب الصلاة/حدیث: 1535]

حضرت عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم جب رات کے وقت ذوالحلیفہ وادی کے نشیب میں آرام کے لیے اترے تو آپ سے خواب میں کہا گیا: ”آپ مبارک وادی میں ہیں۔“ (راوی حدیث) موسیٰ بن عقبہ رحمہ اللہ نے کہا: حضرت سالم رحمہ اللہ نے ہمارے ساتھ وہیں اونٹ بٹھایا جہاں حضرت ابن عمر رضی اللہ عنہما بٹھایا کرتے تھے۔ وہ اسی جگہ کا قصد کر رہے تھے جہاں رسول اللہ صلی اللہ علیہ وسلم نے پڑاؤ کیا تھا۔ یہ جگہ وادی کے نشیب میں واقع مسجد کے نیچے تھی، یعنی وادی عقیق اور راستے کے درمیان واقع تھی۔ [صحيح البخاري/كتاب الصلاة/حدیث: 2336]

حضرت عبداللہ بن عمر رضی اللہ عنہما سے روایت ہے، وہ نبی صلی اللہ علیہ وسلم سے بیان کرتے ہیں کہ آپ کو ایک خواب دکھایا گیا جبکہ آپ مقامِ ذوالحلیفہ میں محوِ استراحت تھے۔ آپ سے کہا گیا: ”بلاشبہ آپ بابرکت وادی میں ہیں۔“ [صحيح البخاري/كتاب الصلاة/حدیث: 7345]