حضرت عبداللہ بن عباس رضی اللہ عنہما فرمانِ الہٰی ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ [سورة القيامة: 16] ”(اے پیغمبر!) آپ وحی کو جلدی جلدی یاد کرنے کے لیے اپنی زبان کو حرکت نہ دیں۔“ کی تفسیر بیان کرتے ہوئے فرماتے ہیں کہ رسول اللہ صلی اللہ علیہ وسلم نزولِ وحی کے وقت بہت مشقت برداشت کرتے تھے اور آپ صلی اللہ علیہ وسلم (اکثر) اپنے لب مبارک کو حرکت دیا کرتے تھے۔ حضرت عبداللہ بن عباس رضی اللہ عنہما نے کہا: میں آپ کے سامنے اپنے ہونٹ ہلاتا ہوں جس طرح رسول اللہ صلی اللہ علیہ وسلم ہلاتے تھے۔ (آپ کے شاگرد) سعید بن جبیر رحمہ اللہ کہتے ہیں کہ میں اپنے ہونٹ ہلاتا ہوں جس طرح میں نے حضرت عبداللہ بن عباس رضی اللہ عنہما کو ہلاتے ہوئے دیکھا، پھر انہوں نے اپنے ہونٹ ہلائے۔ حضرت عبداللہ بن عباس رضی اللہ عنہما نے کہا: اس پر اللہ تعالیٰ نے یہ آیت نازل کی: ﴿لَا تُحَرِّكْ بِهِ لِسَانَكَ لِتَعْجَلَ بِهِ * إِنَّ عَلَيْنَا جَمْعَهُ وَقُرْآنَهُ﴾ [سورة القيامة: 16-17] ”(اے نبی!) اس وحی کو جلدی جلدی یاد کرنے کے لیے اپنی زبان کو حرکت نہ دو، اسے جمع کرنا اور پڑھا دینا ہماری ذمے داری ہے۔“ یعنی آپ کے سینے میں محفوظ کر دینا اور پڑھانا ہمارا کام ہے۔ پھر ارشادِ الہٰی ﴿فَإِذَا قَرَأْنَاهُ فَاتَّبِعْ قُرْآنَهُ﴾ [سورة القيامة: 18] ”چنانچہ جب ہم پڑھ چکیں تو ہمارے پڑھنے کی پیروی کرو۔“ کی تفسیر کرتے ہوئے فرمایا: خاموشی سے کان لگا کر سنتے رہو۔ پھر فرمانِ الہٰی ﴿ثُمَّ إِنَّ عَلَيْنَا بَيَانَهُ﴾ [سورة القيامة: 19] ”اس کا بیان کرنا بھی ہمارا کام ہے۔“ کی تفسیر کرتے ہوئے فرمایا: پھر اس کا مطلب سمجھا دینا بھی ہماری ذمے داری ہے۔ ان آیات کے نزول کے بعد جب جبریل علیہ السلام آپ صلی اللہ علیہ وسلم کے پاس آ کر قرآن سناتے تو آپ صلی اللہ علیہ وسلم کان لگا کر سنتے رہتے، جب وہ چلے جاتے تو آپ صلی اللہ علیہ وسلم (وعدہ الٰہی کے مطابق) اس طرح پڑھتے جس طرح جبریل علیہ السلام نے پڑھا ہوتا۔ [صحيح البخاري/كتاب بدء الوحى/حدیث: 5]

حضرت عبداللہ بن عباس رضی اللہ عنہما سے روایت ہے، انہوں نے کہا: ”جب نبی صلی اللہ علیہ وسلم پر وحی نازل ہوتی تو آپ (اس کو یاد کرنے کے لیے) اپنی زبان کو حرکت دیا کرتے تھے۔“ سفیان نے بیان کیا کہ ”آپ کا مقصد اس وحی کو یاد کرنا ہوتا۔“ اس پر اللہ تعالیٰ نے یہ آیات نازل فرمائیں: ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ [سورة القيامة: 16] ”آپ قرآن کو جلدی یاد کر لینے کی نیت سے اپنی زبان کو حرکت نہ دیں۔“ [صحيح البخاري/كتاب بدء الوحى/حدیث: 4927]

حضرت موسیٰ بن ابی عائشہ سے روایت ہے، انہوں نے حضرت سعید بن جبیر رحمہ اللہ سے اللہ تعالیٰ کے فرمان ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ [سورة القيامة: 16] کے متعلق پوچھا تو انہوں نے بیان کیا کہ حضرت ابن عباس رضی اللہ عنہم نے فرمایا: ”جب آپ صلی اللہ علیہ وسلم پر وحی نازل ہوتی تو آپ اپنے ہونٹ ہلایا کرتے تھے، اس لیے آپ سے کہا گیا: اسے یاد کرنے کے لیے اپنی زبان کو حرکت نہ دیں (آپ کسی لفظ کے چھوٹ جانے کے خوف سے ایسا کرتے تھے) اس کا جمع کر دینا اور پڑھا دینا ہمارے ذمے ہے، یعنی ہم خود آپ کے دل میں اس کو محفوظ کر دیں گے اور آپ کو پڑھا بھی دیں گے، لہٰذا جب ہم اس کو پڑھ چکیں تو آپ اس کے پیچھے پیچھے پڑھیں، پھر اس کا بیان کر دینا بھی ہمارے ذمے ہے، یعنی ہم اسے آپ کی زبان پر جاری کر دیں گے۔“ [صحيح البخاري/كتاب بدء الوحى/حدیث: 4928]

حضرت ابن عباس رضی اللہ عنہما سے روایت ہے، انہوں نے ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ [سورة القيامة: 16] کی تفسیر کرتے ہوئے فرمایا کہ جبریل علیہ السلام جب وحی لے کر آتے تو رسول اللہ صلی اللہ علیہ وسلم اسے یاد کرنے کے لیے اپنی زبان اور ہونٹوں کو ہلاتے تھے۔ اس سے آپ صلی اللہ علیہ وسلم کو بڑی دشواری پیش آتی اور یہ دشواری آپ صلی اللہ علیہ وسلم سے پہچانی جاتی تھی، اس پر اللہ تعالیٰ نے وہ آیات اتاری جو ﴿لَا أُقْسِمُ بِيَوْمِ الْقِيَامَةِ﴾ [سورة القيامة: 1] میں ہیں کہ ”آپ جلدی کرتے ہوئے زبان کو نہ ہلایا کریں۔ اس کا آپ کے سینے میں جمع کر دینا اور اسے پڑھ دینا ہماری ذمہ داری ہے۔“ ﴿فَإِذَا قَرَأْنَاهُ فَاتَّبِعْ قُرْآنَهُ﴾ [سورة القيامة: 18] کا مطلب ہے کہ ”جب ہم قرآن کو اتار رہے ہوں تو آپ غور سے سنا کریں۔“ ﴿ثُمَّ إِنَّ عَلَيْنَا بَيَانَهُ﴾ [سورة القيامة: 19] کا مطلب ہے کہ ”ہم آپ کی زبان کے ذریعے سے اس کی وضاحت کرا دیں گے۔“ اس کے بعد آپ صلی اللہ علیہ وسلم کی عادتِ مبارک یہ تھی کہ جب بھی جبریل علیہ السلام آپ صلی اللہ علیہ وسلم کے پاس آتے تو آپ صلی اللہ علیہ وسلم سر جھکا کر بیٹھ جاتے۔ جب وہ چلے جاتے تو اللہ تعالیٰ کے وعدے کے مطابق آپ صلی اللہ علیہ وسلم اس کی قراءت کرتے۔ (اس سورت کے آخر میں ہے:) ﴿أَوْلَىٰ لَكَ فَأَوْلَىٰ﴾ [سورة القيامة: 34] اس سے دھمکی اور ڈرانا مقصود ہے، یعنی ”تیرے لیے تباہی ہو، پھر تیرے لیے بربادی ہو۔“ [صحيح البخاري/كتاب بدء الوحى/حدیث: 4929]

حضرت ابن عباس رضی اللہ عنہما سے روایت ہے، انہوں نے اللہ تعالیٰ کے اس ارشاد: ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ [سورة القيامة: 16] ”اس وحی کو جلدی جلدی یاد کرنے کی خاطر اپنی زبان کو حرکت نہ دیں“ کی تفسیر کرتے ہوئے فرمایا کہ جب جبریل علیہ السلام وحی لے کر آتے تو رسول اللہ صلی اللہ علیہ وسلم ان کے ساتھ اپنی زبان اور ہونٹوں کو حرکت دیتے تھے، آپ صلی اللہ علیہ وسلم پر یہ معاملہ گراں تھا اور یہ گرانی واضح طور پر معلوم ہوتی تھی، تو اللہ تعالیٰ نے (سورہ قیامہ والی) مذکورہ آیت نازل فرمائی کہ آپ یاد کرنے کی جلدی میں قرآن کے ساتھ اپنی زبان کو حرکت نہ دیں، بیشک ﴿إِنَّ عَلَيْنَا جَمْعَهُ وَقُرْآنَهُ﴾ [سورة القيامة: 17] ”اس قرآن کو (آپ کے دل میں) جمع کر دینا اور پڑھا دینا ہمارے ذمے ہے“، ﴿فَإِذَا قَرَأْنَاهُ فَاتَّبِعْ قُرْآنَهُ﴾ [سورة القيامة: 18] ”جب ہم اسے پڑھ چکیں تو اس وقت پڑھے ہوئے کی اتباع کریں“ یعنی جب ہم قرآن نازل کریں تو آپ خاموشی سے سنیں، ﴿ثُمَّ إِنَّ عَلَيْنَا بَيَانَهُ﴾ [سورة القيامة: 19] ”پھر ہمارے ذمے اس کا بیان کرنا بھی ہے“ یعنی یہ ہماری ذمہ داری ہے کہ آپ کی زبان مبارک سے اس کی وضاحت کرائیں، اس کے بعد جب جبریل علیہ السلام آتے تو آپ صلی اللہ علیہ وسلم گردن جھکا کر اسے سنتے، جب وہ چلے جاتے تو آپ صلی اللہ علیہ وسلم قرآن اسی طرح پڑھتے جیسا کہ اللہ تعالیٰ نے آپ سے وعدہ فرمایا تھا۔ [صحيح البخاري/كتاب بدء الوحى/حدیث: 5044]

حضرت عبداللہ بن عباس رضی اللہ عنہ سے روایت ہے انہوں نے ارشادِ باری تعالیٰ: ﴿لَا تُحَرِّكْ بِهِ لِسَانَكَ لِتَعْجَلَ بِهِ﴾ [سورة القيامة: 16] کی تفسیر کرتے ہوئے بیان کیا کہ نبی صلی اللہ علیہ وسلم نزولِ وحی کے وقت شدت محسوس کرتے تھے اور اپنے ہونٹ ہلاتے تھے۔ ”میں تمہیں ہونٹ ہلا کر دکھاتا ہوں جس طرح رسول اللہ صلی اللہ علیہ وسلم انہیں حرکت دیا کرتے تھے۔“ (راویِ حدیث) حضرت سعید بن جبیر رضی اللہ عنہ نے کہا: ”میں اپنے ہونٹ ہلاتا ہوں جیسے میں نے حضرت عبداللہ بن عباس رضی اللہ عنہ کو ہونٹ ہلاتے دیکھا تھا“، پھر انہوں نے اپنے دونوں ہونٹ ہلائے۔ (حضرت عبداللہ بن عباس رضی اللہ عنہ کہتے ہیں) اس پر اللہ تعالیٰ نے یہ آیت نازل فرمائی: ﴿إِنَّ عَلَيْنَا جَمْعَهُ وَقُرْآنَهُ﴾ [سورة القيامة: 17] ”بیشک اس (وحی) کو آپ کے دل میں جمع کرنا اور زبان سے پڑھوا دینا ہمارے ذمے ہے۔“ یعنی تمہارے سینے میں قرآن کا جمع کر دینا اور اس کا پڑھا دینا ہمارا کام ہے۔ ﴿فَإِذَا قَرَأْنَاهُ فَاتَّبِعْ قُرْآنَهُ﴾ [سورة القيامة: 18] ”پھر جب ہم اس کو پڑھ چکیں تو اس وقت آپ اس کے پڑھے ہوئے کی اتباع کریں۔“ اس کا مطلب یہ ہے کہ حضرت جبریل علیہ السلام کے پڑھتے وقت کان لگا کر سنتے رہیں اور خاموش رہیں، یہ ہمارا ذمہ ہے کہ آپ قرآن اسی طرح پڑھیں گے۔ حضرت عبداللہ بن عباس رضی اللہ عنہ نے کہا: اس آیت کے اترنے کے بعد حضرت جبریل علیہ السلام آتے تو رسول اللہ صلی اللہ علیہ وسلم کان لگا کر سنتے، پھر جب حضرت جبریل علیہ السلام چلے جاتے تو نبی صلی اللہ علیہ وسلم لوگوں کو اسی طرح پڑھ کر سنا دیتے جیسا کہ حضرت جبریل علیہ السلام نے آپ کو پڑھ کر سنایا تھا۔ [صحيح البخاري/كتاب بدء الوحى/حدیث: 7524]