حضرت ہشام بن عروہ اپنے باپ سے روایت کرتے ہیں، انہوں نے کہا کہ حضرت خولہ بنت حکیم رضی اللہ عنہا ان عورتوں میں سے ہیں جنہوں نے اپنے آپ کو نبی صلی اللہ علیہ وسلم کے لیے ہبہ کیا تھا۔ اس پر حضرت عائشہ رضی اللہ عنہا نے کہا: ”کیا عورت کو شرم نہیں آتی کہ وہ اپنے آپ کو کسی مرد کے لیے ہبہ کرتی ہے؟“ پھر جب یہ آیت نازل ہوئی: ﴿تُرْجِي مَنْ تَشَاءُ مِنْهُنَّ وَتُؤْوِي إِلَيْكَ مَنْ تَشَاءُ﴾ [سورة الأحزاب: 51] ”(اے پیغمبر!) تو اپنی جس بیوی کو چاہے پیچھے ڈال دے۔“ تو میں نے کہا: ”اے اللہ کے رسول! مجھے اب پتا چلا ہے کہ آپ کا رب آپ کی خواہش پوری کرنے میں کس قدر جلدی کرتا ہے۔“ اس حدیث کو ابو سعید مؤدب، محمد بن بشر اور عبدہ نے ہشام سے، انہوں نے اپنے والد عروہ سے، انہوں نے حضرت عائشہ رضی اللہ عنہا سے بیان کیا، وہ ایک دوسرے سے حدیث میں کچھ اضافہ کرتے تھے۔ [صحيح البخاري/كتاب النكاح/حدیث: 5113]

حضرت عائشہ رضی اللہ عنہا سے روایت ہے، انہوں نے فرمایا: ”مجھے ان عورتوں پر غیرت آتی تھی جو خود کو رسول اللہ صلی اللہ علیہ وسلم کے لیے ہبہ کر دیتی تھیں۔ میں کہتی تھی: ”بھلا یہ کیا بات ہوئی کہ عورت خود کو کسی کے لیے ہبہ کر دے؟“ پھر جب اللہ تعالیٰ نے یہ آیت نازل فرمائی: ﴿تُرْجِي مَنْ تَشَاءُ مِنْهُنَّ وَتُؤْوِي إِلَيْكَ مَنْ تَشَاءُ ۖ وَمَنِ ابْتَغَيْتَ مِمَّنْ عَزَلْتَ فَلَا جُنَاحَ عَلَيْكَ﴾ [سورة الأحزاب: 51] ”آپ جس بیوی کو چاہیں علیحدہ رکھیں اور جسے چاہیں اپنے پاس بلا لیں اور علیحدہ رکھنے کے بعد جسے چاہیں اپنے پاس بلا لیں، آپ پر کوئی مضائقہ نہیں۔“ میں نے دل میں کہا: ”(اللہ کے رسول!) میں تو یہ دیکھ رہی ہوں کہ آپ کی جیسی خواہش ہو، آپ کا رب اسے بلا تاخیر فوراً پوری کر دیتا ہے۔““ [صحيح البخاري/كتاب النكاح/حدیث: 4788]