حضرت انس رضی اللہ عنہ سے روایت ہے کہ نبی صلی اللہ علیہ وسلم ”سینگوں والے دو چتکبرے مینڈھوں کی قربانی کیا کرتے تھے اور آپ اپنا پاؤں ان کی گردن پر رکھتے، پھر اپنے ہاتھ سے انہیں ذبح کرتے تھے۔“ [صحيح البخاري/كتاب الأضاحي/حدیث: 5564]

حضرت انس بن مالک رضی اللہ عنہ سے روایت ہے، انہوں نے فرمایا کہ: ”نبی صلی اللہ علیہ وسلم دو مینڈھوں کی قربانی کیا کرتے تھے اور میں بھی دو مینڈھوں کی قربانی کرتا ہوں۔“ [صحيح البخاري/كتاب الأضاحي/حدیث: 5553]

حضرت انس رضی اللہ عنہ ہی سے روایت ہے کہ ”رسول اللہ صلی اللہ علیہ وسلم سینگوں والے دو چتکبرے مینڈھوں کی طرف متوجہ ہوئے اور انہیں اپنے ہاتھ سے ذبح کیا“، وہیب نے ایوب سے روایت کرنے میں عبدالوہاب کی متابعت کی ہے، اسماعیل اور حاتم نے ایوب سے، انہوں نے ابن سیرین سے، انہوں نے حضرت انس رضی اللہ عنہ سے اس روایت کو بیان کیا ہے۔ [صحيح البخاري/كتاب الأضاحي/حدیث: 5554]

حضرت انس رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم نے دو سیاہ سفید مینڈھوں کی قربانی دی۔ میں نے آپ کو دیکھا کہ آپ نے اپنا پاؤں جانور کے پہلو پر رکھا اور «بِسْمِ اللّٰهِ اَللّٰهُ أَكْبَرُ» ”اللہ کے نام کے ساتھ، اللہ سب سے بڑا ہے“ پڑھ کر ان دونوں کو اپنے دستِ مبارک سے ذبح کیا۔“ [صحيح البخاري/كتاب الأضاحي/حدیث: 5558]

حضرت انس رضی اللہ عنہ سے روایت ہے کہ نبی صلی اللہ علیہ وسلم نے سینگوں والے دو سیاہ سفید مینڈھوں کی قربانی دی۔ آپ نے انہیں اپنے ہاتھ سے ذبح کیا، «بِسْمِ اللّٰهِ وَاللّٰهُ أَكْبَرُ» ”بسم اللہ، اللہ اکبر“ پڑھا اور اپنا پاؤں ان کی گردن پر رکھا۔ [صحيح البخاري/كتاب الأضاحي/حدیث: 5565]

حضرت انس رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم نے دو مینڈھوں کی قربانی دی، آپ صلی اللہ علیہ وسلم نے ذبح کرتے وقت «بِسْمِ اللّٰهِ وَاللّٰهُ أَكْبَرُ» ”اللہ کے نام کے ساتھ اور اللہ سب سے بڑا ہے“ کہا۔“ [صحيح البخاري/كتاب الأضاحي/حدیث: 7399]