حضرت عائشہ رضی اللہ عنہا سے روایت ہے، انہوں نے کہا: جب رسول اللہ صلی اللہ علیہ وسلم ہجرت کر کے مدینہ طیبہ تشریف لائے تو حضرت ابوبکر صدیق رضی اللہ عنہ اور حضرت بلال رضی اللہ عنہ کو بخار نے آ لیا۔ میں ان دونوں کے پاس عیادت کے لیے گئی اور پوچھا: ”اے والد محترم! آپ کا کیا حال ہے؟ اے بلال! تم کیسے ہو؟“ جب حضرت ابوبکر صدیق رضی اللہ عنہ کو بخار ہوتا تو وہ یہ شعر پڑھتے: «كُلُّ امْرِئٍ مُصَبَّحٌ فِي أَهْلِهِ، وَالْمَوْتُ أَدْنَى مِنْ شِرَاكِ نَعْلِهِ» ”ہر شخص اپنے اہل خانہ میں صبح کرتا ہے لیکن موت اس کے جوتے کے تسمے سے بھی زیادہ قریب ہے۔“ حضرت بلال رضی اللہ عنہ کا جب بخار اترتا تو بآواز بلند یہ اشعار پڑھتے: «أَلَا لَيْتَ شِعْرِي هَلْ أَبِيتَنَّ لَيْلَةً، بِوَادٍ وَحَوْلِي إِذْخِرٌ وَجَلِيلُ، وَهَلْ أَرِدَنْ يَوْمًا مِيَاهَ مِجَنَّةٍ، وَهَلْ يَبْدُوَنْ لِي شَامَةٌ وَطَفِيلُ» ”کاش! میں ایسی وادی (مکہ) میں رات بسر کرتا کہ میرے چاروں طرف اذخر اور جلیل نامی گھاس ہوتی، کیا میں کسی دن مجنہ کے چشموں تک پہنچوں گا؟ اور کیا میرے سامنے شامہ اور طفیل نامی پہاڑ ظاہر ہوں گے؟“ راوی نے کہا کہ حضرت عائشہ رضی اللہ عنہا نے فرمایا: پھر میں رسول اللہ صلی اللہ علیہ وسلم کی خدمت میں حاضر ہوئی اور آپ صلی اللہ علیہ وسلم کو صورت حال سے آگاہ کیا تو آپ صلی اللہ علیہ وسلم نے ان الفاظ سے دعا فرمائی: «اللَّهُمَّ حَبِّبْ إِلَيْنَا الْمَدِينَةَ كَحُبِّنَا مَكَّةَ أَوْ أَشَدَّ، وَصَحِّحْهَا لَنَا، وَبَارِكْ لَنَا فِي صَاعِنَا وَمُدِّنَا، وَانْقُلْ حُمَّاهَا فَاجْعَلْهَا بِالْجُحْفَةِ» ”اے اللہ! ہمارے دلوں میں مدینہ طیبہ کی محبت پیدا کر دے جیسا کہ ہمیں مکہ مکرمہ محبوب ہے بلکہ اس سے بھی زیادہ مدینہ طیبہ کی محبت عطا فرما اور اس کی آب و ہوا کو صحت بخش کر دے، ہمارے لیے اس کے صاع اور مد میں برکت عطا فرما اور اس کے بخار کو کہیں اور منتقل کر دے، اسے جحفہ میں بھیج دے۔“ [صحيح البخاري/كتاب المرضى/حدیث: 5677]

حضرت عائشہ رضی اللہ عنہا سے روایت ہے، انہوں نے فرمایا کہ جب رسول اللہ صلی اللہ علیہ وسلم مدینہ طیبہ تشریف لائے تو حضرت ابوبکر رضی اللہ عنہ اور حضرت بلال رضی اللہ عنہ کو بخار آگیا۔ حضرت ابوبکر رضی اللہ عنہ کو جب بخار آتا تو یہ شعر پڑھتے: ”گھر میں اپنے صبح کرتا ہے ایک فردِ بشر، موت اس کی جوتی کے تسمے سے ہے نزدیک تر۔“ حضرت بلال رضی اللہ عنہ کا جب بخار اترتا تو باآوازِ بلند یہ شعر کہتے: ”کاش! پھر مکہ کی وادی میں رہوں میں ایک رات، سب طرف اُگے ہوں وہاں جلیل و اذخر نبات۔ کاش! پھر دیکھوں میں شامہ، کاش! پھر دیکھوں طفیل، اور پیوں پانی مجنہ کے جو ہیں آبِ حیات۔ اے اللہ! شیبہ بن ربیعہ، عتبہ بن ربیعہ اور امیہ بن خلف پر تیری لعنت ہو، جنہوں نے ہمارے ملک سے ہمیں نکال کر ایک وبائی زمین کی طرف دھکیل دیا۔“ یہ سن کر رسول اللہ صلی اللہ علیہ وسلم نے فرمایا: «اللَّهُمَّ حَبِّبْ إِلَيْنَا الْمَدِينَةَ كَحُبِّنَا مَكَّةَ أَوْ أَشَدَّ، وَصَحِّحْهَا، وَبَارِكْ لَنَا فِي مُدِّهَا وَصَاعِهَا، وَانْقُلْ حُمَّاهَا إِلَى الْجُحْفَةِ» ”اے اللہ! مدینہ طیبہ کی محبت اس طرح ہمارے دلوں میں ڈال دے جس طرح مکہ سے محبت کرتے ہیں بلکہ اس سے بھی زیادہ۔ اے اللہ! ہمارے صاع اور مد میں برکت فرما اور مدینہ کی آب و ہوا ہمارے لیے اچھی کر دے اور اس کا بخار جحفہ کی طرف بھیج دے۔“ حضرت عائشہ رضی اللہ عنہا فرماتی ہیں کہ جب ہم مدینہ طیبہ آئے تو وہ اللہ کی زمینوں میں سب سے وبائی زمین تھی اور اس وادیِ بطحان میں بدبودار اور بدمزہ پانی بہتا تھا۔ [صحيح البخاري/كتاب المرضى/حدیث: 1889]