حضرت انس رضی اللہ عنہ سے روایت ہے کہ ”نبی صلی اللہ علیہ وسلم کے موئے مبارک آپ کے کندھوں پر لہراتے تھے۔“ [صحيح البخاري/كتاب اللباس/حدیث: 5903]

حضرت براء رضی اللہ عنہ سے روایت ہے، انہوں نے فرمایا: نبی صلی اللہ علیہ وسلم میانہ قامت تھے، آپ صلی اللہ علیہ وسلم کے دونوں شانوں کے درمیان کشادگی تھی، آپ صلی اللہ علیہ وسلم کے بال کان کی لو تک پہنچتے تھے۔ میں نے ایک دفعہ آپ صلی اللہ علیہ وسلم کو سرخ (دھاری دار) جوڑا پہنے دیکھا، میں نے آپ صلی اللہ علیہ وسلم سے زیادہ کسی کو حسین اور خوبصورت نہیں دیکھا۔ ایک روایت میں ہے کہ آپ صلی اللہ علیہ وسلم کے بال کندھوں تک پہنچتے تھے۔ [صحيح البخاري/كتاب اللباس/حدیث: 3551]

حضرت براء رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم کا قد درمیانہ تھا، میں نے آپ کو سرخ جوڑے میں دیکھا۔ آپ سے زیادہ خوبصورت میں نے کسی کو نہیں دیکھا۔“ [صحيح البخاري/كتاب اللباس/حدیث: 5848]

حضرت براء رضی اللہ عنہ سے روایت ہے، انہوں نے بیان کیا کہ ”میں نے سرخ جوڑے میں ملبوس نبی صلی اللہ علیہ وسلم سے زیادہ کسی کو خوبصورت نہیں دیکھا۔“ (امام بخاری رحمہ اللہ کہتے ہیں) میرے کچھ ساتھیوں نے مالک بن اسماعیل سے بیان کیا کہ ”آپ صلی اللہ علیہ وسلم کے بال کندھوں کے قریب لہراتے تھے۔“ ابو اسحاق کہتے ہیں کہ ”میں نے (حضرت براء رضی اللہ عنہ کو) ایک سے زیادہ مرتبہ یہ حدیث بیان کرتے سنا، وہ جب بھی یہ حدیث بیان کرتے تو مسکراتے۔“ اس کی متابعت شعبہ نے کی ہے کہ ”آپ صلی اللہ علیہ وسلم کے بال آپ کے کانوں کی لو تک تھے۔“ [صحيح البخاري/كتاب اللباس/حدیث: 5901]

حضرت انس رضی اللہ عنہ سے روایت ہے کہ نبی صلی اللہ علیہ وسلم کے سر کے ”موئے مبارک آپ کے شانوں تک پہنچے تھے۔“ [صحيح البخاري/كتاب اللباس/حدیث: 5904]

حضرت قتادہ رضی اللہ عنہ سے روایت ہے انہوں نے کہا: ”میں نے حضرت انس بن مالک رضی اللہ عنہ سے رسول اللہ صلی اللہ علیہ وسلم کے بالوں کے متعلق دریافت کیا تو انہوں نے فرمایا: ”رسول اللہ صلی اللہ علیہ وسلم کے بال قدرے خمیدہ تھے، نہ الجھے ہوئے انتہائی پیچیدہ اور نہ تنے ہوئے سیدھے کھڑے تھے، اور وہ دونوں کانوں اور کندھوں کے درمیان تھے۔“” [صحيح البخاري/كتاب اللباس/حدیث: 5905]