حضرت ابوہریرہ رضی اللہ عنہ ہی سے روایت ہے، انہوں نے کہا کہ نبی صلی اللہ علیہ وسلم نے فرمایا: ”پھر سجدے سے اپنا سر اٹھا، حتی کہ اطمینان سے بیٹھ جا۔“ [صحيح البخاري/كتاب الاستئذان/حدیث: 6252]

حضرت ابوہریرہ رضی اللہ عنہ سے روایت ہے کہ ایک دفعہ رسول اللہ صلی اللہ علیہ وسلم مسجد میں تشریف لائے، اتنے میں ایک آدمی آیا اور اس نے نماز پڑھی پھر اس نے نبی صلی اللہ علیہ وسلم کو سلام کیا۔ آپ نے (سلام کا جواب دینے کے بعد) فرمایا: ”واپس جاؤ اور نماز پڑھو تم نے نماز نہیں پڑھی۔“ وہ آدمی واپس گیا اور اسی طرح نماز پڑھی جیسے اس نے (پہلے) پڑھی تھی۔ پھر اس نے آ کر نبی صلی اللہ علیہ وسلم کو سلام کیا۔ آپ نے (سلام کا جواب دینے کے بعد) فرمایا: ”واپس جاؤ اور نماز پڑھو تم نے نماز نہیں پڑھی۔“ پھر اسی طرح تین دفعہ ہوا بالآخر اس نے کہا: قسم ہے اس اللہ کی جس نے آپ کو حق کے ساتھ بھیجا ہے! میں اس سے اچھی نماز نہیں پڑھ سکتا، لہٰذا آپ مجھے بتا دیجیے۔ آپ نے فرمایا: ”اچھا جب تم نماز کے لیے کھڑے ہو تو «اللهُ أَكْبَرُ» ”اللہ اکبر“ کہو، پھر قرآن سے جو تمہیں یاد ہو پڑھو۔ اس کے بعد اطمینان سے رکوع کرو، پھر سر اٹھاؤ اور سیدھے کھڑے ہو جاؤ۔ پھر سجدہ کرو اور سجدے میں اطمینان سے رہو۔ پھر سر اٹھا کر اطمینان سے بیٹھ جاؤ، اسی طرح اپنی پوری نماز مکمل کرو۔“ [صحيح البخاري/كتاب الاستئذان/حدیث: 757]