حضرت سہل بن سعد رضی اللہ عنہ سے روایت ہے، انہوں نے فرمایا کہ حضرت علی بن ابی طالب رضی اللہ عنہ کو کوئی نام ”ابو تراب“ سے زیادہ پسند نہیں تھا۔ جب انہیں ”ابو تراب“ کہا جاتا تو وہ بہت خوش ہوتے تھے۔ ہوا یوں کہ (ایک مرتبہ) رسول اللہ صلی اللہ علیہ وسلم نے ان کو گھر میں نہ پایا، آپ صلی اللہ علیہ وسلم نے دریافت فرمایا: ”(بیٹی!) تمہارے چچا کے بیٹے (شوہر نامدار) کدھر گئے ہیں؟“ انہوں نے بتایا کہ میرے اور ان کے درمیان کچھ تلخ کلامی ہو گئی تھی، اس لیے وہ مجھ سے ناراض ہو کر باہر چلے گئے ہیں اور انہوں نے میرے ہاں قیلولہ بھی نہیں کیا۔ رسول اللہ صلی اللہ علیہ وسلم نے ایک شخص سے فرمایا: ”دیکھو وہ (علی) کہاں ہیں؟“ وہ شخص گیا اور واپس آ کر کہنے لگا: ”اللہ کے رسول! وہ تو مسجد میں سو رہے ہیں۔“ چنانچہ رسول اللہ صلی اللہ علیہ وسلم مسجد میں تشریف لائے تو حضرت علی بن ابی طالب رضی اللہ عنہ وہاں لیٹے ہوئے تھے جبکہ ایک طرف سے ان کی چادر گری ہوئی تھی اور ان کا وہ پہلو گرد آلود ہو چکا تھا۔ رسول اللہ صلی اللہ علیہ وسلم ان سے مٹی صاف کرنے لگے اور فرمانے لگے: ” «قُمْ أَبَا تُرَابٍ، قُمْ أَبَا تُرَابٍ» “ یعنی ”ابو تراب! اٹھو، ابو تراب! اٹھو۔“ [صحيح البخاري/كتاب الاستئذان/حدیث: 6280]

حضرت سہل بن سعد رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم حضرت فاطمہ رضی اللہ عنہا کے گھر تشریف لائے تو حضرت علی رضی اللہ عنہ کو گھر میں نہ پا کر ان سے پوچھا: ”تمہارے چچا زاد کہاں گئے؟“ انہوں نے عرض کیا: ہمارے درمیان کچھ جھگڑا ہو گیا تھا، وہ مجھ سے ناراض ہو کر کہیں باہر چلے گئے ہیں، انہوں نے میرے ہاں قیلولہ نہیں کیا (یہاں نہیں سوئے۔) رسول اللہ صلی اللہ علیہ وسلم نے ایک شخص سے فرمایا: ”دیکھو وہ کہاں ہیں؟“ وہ دیکھ کر آیا اور کہنے لگا: اللہ کے رسول! وہ مسجد میں سو رہے ہیں۔ (یہ سن کر) آپ مسجد میں تشریف لے گئے جہاں حضرت علی رضی اللہ عنہ لیٹے ہوئے تھے۔ ان کے ایک پہلو سے چادر ہٹنے کی وجہ سے وہاں مٹی لگ گئی تھی۔ رسول اللہ صلی اللہ علیہ وسلم ان کے جسم سے مٹی صاف کرتے ہوئے فرمانے لگے: ”ابو تراب اٹھو! ابو تراب اٹھو!۔“ [صحيح البخاري/كتاب الاستئذان/حدیث: 441]

حضرت سہل بن سعد رضی اللہ عنہ سے روایت ہے، ان کے پاس ایک آدمی آیا اور کہنے لگا کہ فلاں آدمی جو مدینہ طیبہ کا حاکم ہے وہ برسرِ منبر حضرت علی رضی اللہ عنہ کے متعلق بدگوئی کرتا ہے۔ انہوں نے پوچھا: ”وہ کیا کہتا ہے؟“ اس نے بتایا کہ وہ انہیں «أَبُو تُرَابٍ» ”ابو تراب“ کہتا ہے۔ حضرت سہل رضی اللہ عنہ نے مسکرا کر جواب دیا: ”اللہ کی قسم! یہ نام تو ان کا خود نبی کریم صلی اللہ علیہ وسلم نے رکھا ہے، اور خود حضرت علی رضی اللہ عنہ کو اس نام سے زیادہ کوئی دوسرا نام پسند نہیں تھا۔“ راویِ حدیث کہتا ہے کہ میں نے حضرت سہل رضی اللہ عنہ سے حدیث سننے کی فرمائش کی کہ اے ابو عباس رضی اللہ عنہ! وہ کیسے ہوا؟ انہوں نے فرمایا کہ ایک دفعہ حضرت علی رضی اللہ عنہ، حضرت فاطمہ رضی اللہ عنہا کے پاس آئے تو خاوند بیوی میں کچھ تلخ کلامی ہوئی۔ حضرت علی رضی اللہ عنہ وہاں سے فوراً واپس آگئے اور مسجد میں جا کر لیٹ گئے۔ نبی کریم صلی اللہ علیہ وسلم نے (حضرت فاطمہ رضی اللہ عنہا سے) پوچھا: ”تمہارا چچا زاد کہاں ہے؟“ انہوں نے بتایا کہ وہ مسجد میں چلے گئے ہیں۔ آپ صلی اللہ علیہ وسلم ان کے پاس تشریف لائے تو دیکھا کہ ان کی چادر پیٹھ سے گری ہوئی ہے اور ان کی پشت خاک آلود ہو چکی ہے۔ آپ صلی اللہ علیہ وسلم نے ان کی پیٹھ سے مٹی صاف کرتے ہوئے فرمایا: ” «قُمْ أَبَا تُرَابٍ» اے ابوتراب! اٹھو۔“ آپ صلی اللہ علیہ وسلم نے دو مرتبہ فرمایا۔ [صحيح البخاري/كتاب الاستئذان/حدیث: 3703]

حضرت سہل بن سعد رضی اللہ عنہ سے روایت ہے، انہوں نے کہا کہ حضرت علی رضی اللہ عنہ کو ان کی کنیت، ابو تراب، بہت پیاری لگتی تھی۔ وہ جب انہیں اس کنیت سے آواز دیتے تو بہت خوش ہوتے کیونکہ ابو تراب کی کنیت خود نبی صلی اللہ علیہ وسلم نے رکھی تھی۔ ایک دن وہ حضرت فاطمہ رضی اللہ عنہا سے خفا ہو کر باہر چلے گئے اور مسجد کی دیوار کے پاس لیٹ گئے۔ نبی صلی اللہ علیہ وسلم انہیں تلاش کرتے ہوئے ان کے پیچھے آئے تو فرمایا: ”یہ تو دیوار کے پاس لیٹے ہوئے ہیں۔“ جب نبی صلی اللہ علیہ وسلم ان کے پاس تشریف لائے تو ان کی پشت مٹی سے بھری ہوئی تھی۔ آپ صلی اللہ علیہ وسلم ان کی پشت سے مٹی جھاڑتے ہوئے فرمانے لگے: ” «قُمْ أَبَا تُرَابٍ» اے ابو تراب! اٹھ جاؤ۔“ [صحيح البخاري/كتاب الاستئذان/حدیث: 6204]