حضرت عکرمہ رحمہ اللہ سے روایت ہے، انہوں نے کہا کہ میں نے مکہ مکرمہ میں ایک بزرگ کے پیچھے نماز پڑھی تو انہوں نے (اٹھتے، جھکتے وقت) کل بائیس تکبیرات کہیں۔ میں نے حضرت ابن عباس رضی اللہ عنہما سے کہا: یہ تو بے وقوف ہے۔ اس پر انہوں نے فرمایا: تجھے تیری ماں گم پائے، یہ تو ابوالقاسم صلی اللہ علیہ وسلم کی سنت ہے۔ موسیٰ بن اسماعیل نے کہا کہ ہمیں ابان نے حدیث بیان کی، ان سے قتادہ نے، ان سے حضرت عکرمہ رحمہ اللہ نے یہ حدیث بیان کی ہے۔ [صحيح البخاري/كتاب الأذان (صفة الصلوة)/حدیث: 788]

حضرت عکرمہ رحمہ اللہ سے روایت ہے، انہوں نے کہا کہ میں نے ایک آدمی کو مقام ابراہیم کے پاس نماز پڑھتے ہوئے دیکھا کہ وہ جب بھی جھکتا، اٹھتا، کھڑا ہوتا یا بیٹھتا تو تکبیر کہتا۔ میں نے حضرت عبداللہ بن عباس رضی اللہ عنہما کو بتایا تو انہوں نے فرمایا: تیری ماں نہ ہو، کیا یہ نبی صلی اللہ علیہ وسلم کی سی نماز نہیں ہے؟ [صحيح البخاري/كتاب الأذان (صفة الصلوة)/حدیث: 787]