سفیان رحمہ اللہ کا کہنا ہے کہ میں نے سہیل رحمہ اللہ سے کہا: عمرو رحمہ اللہ نے ہمیں قعقاع رحمہ اللہ کے واسطہ سے آپ کے والد سے حدیث سنائی ہے اور میری خواہش یہ تھی کہ وہ مجھے روایت سنائیں، تاکہ ایک راوی کم ہو جائے، تو سہیل رحمہ اللہ نے کہا: میں نے اپنے والد کے شامی دوست، جس سے وہ روایت بیان کرتے ہیں، خود سنی ہے۔ (اب یہ روایت قعقاع رحمہ اللہ اور سہیل رحمہ اللہ کے باپ ابو صالح رحمہ اللہ کی بجائے سہیل رحمہ اللہ سے ہے اور سند عالی ہو گئی ہے) پھر سفیان رحمہ اللہ نے ہمیں سہیل رحمہ اللہ سے عطاء بن یزید رحمہ اللہ کی تمیم داری رضی اللہ عنہ سے روایت سنائی کہ نبی اکرم صلی اللہ علیہ وسلم نے فرمایا: «الدِّينُ النَّصِيحَةُ» ”دین خیرخواہی کا نام ہے۔“ ہم نے پوچھا: کس کی خیر خواہی؟ آپ صلی اللہ علیہ وسلم نے فرمایا: ”اللہ کی، اس کی کتاب کی، اس کے رسول کی، مسلمانوں کے امیروں کی اور عام مسلمانوں کی۔“ [صحيح مسلم/كتاب الإيمان/حدیث: 196]

سفیان ثوری رحمہ اللہ نے سہیل بن ابوصالح رحمہ اللہ سے، انہوں نے عطاء بن یزید لیثی رحمہ اللہ سے، انہوں نے حضرت تمیم داری رضی اللہ عنہ سے اور انہوں نے رسول اللہ صلی اللہ علیہ وسلم سے سابقہ حدیث کی مانند روایت کی۔ [صحيح مسلم/كتاب الإيمان/حدیث: 197]

امام مسلم رحمہ اللہ ایک اور سند سے مذکورہ بالا روایت نقل کرتے ہیں۔ [صحيح مسلم/كتاب الإيمان/حدیث: 198]