حضرت ابوہریرہ رضی اللہ عنہ سے روایت ہے، نبی کریم صلی اللہ علیہ وسلم نے فرمایا: ”تم نے ایسے شہر کے بارے میں سنا ہے جس کی ایک جانب خشکی میں ہے اور دوسری جانب سمندر میں ہے؟“ انہوں نے (صحابہ رضوان اللہ علیہم اجمعین) عرض کی: جی ہاں، اللہ کے رسول صلی اللہ علیہ وسلم ! آپ صلی اللہ علیہ وسلم نے فرمایا: ”قیامت قائم نہیں ہوگی یہاں تک کہ اس کے خلاف بنو اسحاق میں سے ستر ہزار لوگ جہاد کریں گے، وہاں پہنچ کر وہ اتریں گے تو نہ ہتھیاروں سے جنگ کریں گے اور نہ تیر اندازی کریں گے، وہ کہیں گے: «لَا إِلٰهَ إِلَّا اللہُ وَاللہُ أَكْبَرُ» ”اللہ کے سوا کوئی معبود نہیں اور اللہ سب سے بڑا ہے“، تو اس (شہر) کی ایک جانب گر جائے گی۔“ ثور نے کہا: میں سمجھتا ہوں کہ انہوں (حضرت ابوہریرہ رضی اللہ عنہ) نے وہی (کنارہ) مراد لیا جو سمندر میں ہے، پھر آپ صلی اللہ علیہ وسلم نے فرمایا: ”پھر وہ دوسری بار «لَا إِلٰهَ إِلَّا اللہُ وَاللہُ أَكْبَرُ» ”اللہ کے سوا کوئی معبود نہیں اور اللہ سب سے بڑا ہے“ کہیں گے تو اس (شہر) کا دوسرا کنارہ بھی گر جائے گا، پھر وہ تیسری بار «لَا إِلٰهَ إِلَّا اللہُ وَاللہُ أَكْبَرُ» ”اللہ کے سوا کوئی معبود نہیں اور اللہ سب سے بڑا ہے“ کہیں گے تو ان کے لیے راستہ کھل جائے گا اور وہ اس (شہر) میں داخل ہو جائیں گے اور غنائم حاصل کریں گے۔ جب وہ مالِ غنیمت تقسیم کر رہے ہوں گے تو ایک چیختی ہوئی آواز آئے گی، وہ کہے گا: دجال نکل چکا ہے۔ چنانچہ وہ سب کچھ چھوڑ کر (اپنے علاقے کی طرف) لوٹ آئیں گے۔“ [صحيح مسلم/كتاب الفتن وأشراط الساعة/حدیث: 7333]

امام صاحب ایک اور استاد سے یہی روایت بیان کرتے ہیں۔ [صحيح مسلم/كتاب الفتن وأشراط الساعة/حدیث: 7334]