سوید بن غفلہ رضی اللہ عنہ کا بیان ہے کہ نبی کریم صلی اللہ علیہ وسلم کا تحصیلدارِ زکوٰۃ ہمارے ہاں آیا۔ میں نے اس کا ہاتھ پکڑ لیا اور اس کے وثیقے میں پڑھا: ”زکوٰۃ کے خوف سے جدا جدا رہنے والے جانوروں کو جمع نہ کیا جائے اور نہ اکٹھے مال کو علیحدہ علیحدہ کیا جائے۔“ اس روایت میں «رَاضِعُ لَبَنٍ» ”یعنی دودھ والے جانور یا دودھ پیتے بچوں“ کا ذکر نہیں ہے۔ امام ابوداؤد رحمہ اللہ فرماتے ہیں کہ «لَا تُجْمَعُ» ”تم جمع نہ کرو“ اور «لَا يُجْمَعُ» ”جمع نہ کیے جائیں“ کا ایک ہی حکم ہے۔ [سنن ابي داود/كتاب الزكاة /حدیث: 1580]

سوید بن غفلہ رحمہ اللہ بیان کرتے ہیں کہ میں (نبی کریم صلی اللہ علیہ وسلم کے عامل کے ساتھ) چلا، یا کہا کہ مجھے اس شخص نے بیان کیا جو نبی کریم صلی اللہ علیہ وسلم کے عامل کے ساتھ رہا تھا۔ رسول اللہ صلی اللہ علیہ وسلم کے عہد (تحریر) میں یہ تھا: ”زکوٰۃ میں کوئی دودھ والا جانور (بکری وغیرہ) یا دودھ پیتا بچہ نہ لینا، جدا جدا جانوروں کو جمع نہ کرنا اور نہ اکٹھے (رہنے، چرنے والوں) کو جدا جدا کرنا۔“ اور آپ صلی اللہ علیہ وسلم کا تحصیلدارِ زکوٰۃ ان کے پانیوں (چشموں، کنوؤں یا تالابوں) پر پہنچتا تھا، جب بکریاں پانی پینے کے لیے آتی تھیں، تو وہ (مالکوں سے) کہتا تھا: ”اپنے مالوں کی زکوٰۃ پیش کرو۔“ راوی نے بیان کیا، چنانچہ ایک شخص نے «كَوْمَاءَ» ”بڑے کوہان والی“ اونٹنی کا قصد کیا۔ راوی کہتے ہیں کہ میں نے کہا: ”اے ابوصالح! «كَوْمَاءَ» کا کیا معنی ہے؟“ انہوں نے کہا: ”بڑے کوہان والی“، تو عامل نے لینے سے انکار کر دیا (کیونکہ وہ بہت عمدہ تھی)۔ مال والے نے کہا: ”میں پسند کرتا ہوں کہ آپ میری بہترین اونٹنی وصول کریں“، مگر اس نے لینے سے انکار کر دیا۔ تو وہ دوسری پکڑ لایا جو اس سے ذرا کم درجے کی تھی، تو اس نے وہ بھی لینے سے انکار کر دیا۔ چنانچہ وہ ایک اور لے آیا جو اس سے بھی کم درجے کی تھی، تو اس نے وہ لے لی اور کہنے لگا: ”میں یہ لے تو رہا ہوں مگر اندیشہ ہے کہ رسول اللہ صلی اللہ علیہ وسلم مجھ پر خفا ہوں گے۔ آپ صلی اللہ علیہ وسلم مجھے کہیں گے کہ تم اس آدمی کی بہترین اونٹنی لے آئے ہو۔“ امام ابوداؤد رحمہ اللہ فرماتے ہیں کہ ہشیم نے ہلال بن خباب سے اسی کی مانند روایت کیا مگر لفظ «لَا يُفَرَّقُ» استعمال کیا۔ [سنن ابي داود/كتاب الزكاة /حدیث: 1579]