جناب علقمہ بن وائل اپنے والد سے روایت کرتے ہیں کہ ایک شخص ایک حبشی کو پکڑے نبی کریم صلی اللہ علیہ وسلم کے پاس آیا اور کہا: ”اس نے میرے بھتیجے کو قتل کر ڈالا ہے۔“ آپ صلی اللہ علیہ وسلم نے پوچھا: ”تو نے اس کو کس طرح قتل کیا تھا؟“ اس نے بتایا: ”میں نے اس کے سر پر کلہاڑا مارا تھا، لیکن میرا اسے قتل کرنے کا ارادہ نہیں تھا۔“ آپ صلی اللہ علیہ وسلم نے پوچھا: ”کیا تیرے پاس مال ہے کہ تو اس کی دیت دے سکے؟“ اس نے کہا: ”نہیں۔“ آپ صلی اللہ علیہ وسلم نے فرمایا: ”کیا اگر میں تجھے چھوڑ دوں، اور تو لوگوں سے مانگے اور اس کی دیت جمع کر لے (تو کیا ایسے کر سکتا ہے؟)“ اس نے کہا: ”نہیں۔“ آپ صلی اللہ علیہ وسلم نے پوچھا: ”کیا تیرے مالک (یا تیری قوم والے) تجھے اس کی دیت دے سکتے ہیں؟“ اس نے کہا: ”نہیں۔“ تو آپ صلی اللہ علیہ وسلم نے مقتول کے ولی سے کہا: ”اس کو پکڑ لے۔“ چنانچہ وہ اسے قتل کرنے کے لیے لے چلا، تو رسول اللہ صلی اللہ علیہ وسلم نے فرمایا: ”خبردار! اگر اس نے اس کو قتل کر دیا تو اسی کی مانند ہو جائے گا۔“ تو وہ (مقتول کا ولی) قاتل کو لے کر اس جگہ پہنچ گیا جہاں سے اس نے آپ صلی اللہ علیہ وسلم کی بات سنی تھی اور بولا: ”لیجیے! یہ رہا اور جو چاہیں اس کے متعلق حکم فرمائیں۔“ رسول اللہ صلی اللہ علیہ وسلم نے فرمایا: ”اس کو چھوڑ دو، یہ اپنے اور اپنے مقتول کے گناہ اپنے سر لے کر جہنمیوں میں سے ہو گا۔“ سیدنا وائل رضی اللہ عنہ نے کہا: ”چنانچہ اس نے اس کو چھوڑ دیا۔“ [سنن ابي داود/كتاب الديات /حدیث: 4501]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم کے زمانے میں ایک آدمی قتل ہو گیا اور اس کا مقدمہ نبی کریم صلی اللہ علیہ وسلم کے سامنے پیش کیا گیا تو آپ نے قاتل کو مقتول کے وارث کے حوالے کر دیا۔ قاتل نے کہا: ”اے اللہ کے رسول! اللہ کی قسم! میں نے اس کے قتل کا ارادہ نہیں کیا تھا۔“ تو رسول اللہ صلی اللہ علیہ وسلم نے اس کے وارث سے فرمایا: ”خبردار! اگر یہ سچا ہوا پھر تو نے اس کو قتل کر دیا تو، تو جہنم میں جائے گا۔“ چنانچہ اس نے اس کو چھوڑ دیا۔ راوی نے بتایا کہ وہ قاتل چمڑے کی ایک لمبی پٹی سے بندھا ہوا تھا، چنانچہ وہ اپنی پٹی کو گھسیٹتا ہوا چلا گیا اور پھر اس کا نام ہی «ذُو النِّسْعَةِ» ”پٹی والا“ پڑ گیا۔ [سنن ابي داود/كتاب الديات /حدیث: 4498]

سیدنا وائل بن حجر رضی اللہ عنہ کا بیان ہے کہ میں نبی کریم صلی اللہ علیہ وسلم کی خدمت میں حاضر تھا کہ ایک قاتل لایا گیا، اس کی گردن میں چمڑے کی ایک پٹی (بندھی ہوئی) تھی۔ آپ صلی اللہ علیہ وسلم نے مقتول کے ولی کو بلایا اور اس سے فرمایا: ”کیا تم معاف کرتے ہو؟“ اس نے کہا: ”نہیں۔“ آپ صلی اللہ علیہ وسلم نے پوچھا: ”کیا تم دیت لینا قبول کرتے ہو؟“ اس نے کہا: ”نہیں۔“ آپ صلی اللہ علیہ وسلم نے پوچھا: ”کیا قتل کرو گے؟“ اس نے کہا: ”ہاں۔“ آپ صلی اللہ علیہ وسلم نے فرمایا: ”جاؤ اسے لے جاؤ۔“ پس جب اس نے پشت پھیری تو آپ صلی اللہ علیہ وسلم نے (پھر) پوچھا: ”کیا معاف کرتے ہو؟“ اس نے کہا: ”نہیں۔“ آپ صلی اللہ علیہ وسلم نے فرمایا: ”کیا دیت لیتے ہو؟“ اس نے کہا: ”نہیں۔“ آپ صلی اللہ علیہ وسلم نے فرمایا: ”کیا قتل کرو گے؟“ اس نے کہا: ”ہاں۔“ آپ صلی اللہ علیہ وسلم نے فرمایا: ”جاؤ لے جاؤ۔“ پھر چوتھی بار فرمایا: ”اگر تم اس کو معاف کر دو تو یہ اپنے اور اپنے مقتول دونوں کے گناہ اپنے سر لے گا۔“ راوی نے کہا: ”چنانچہ اس نے اس کو معاف کر دیا۔“ وائل رضی اللہ عنہ کہتے ہیں: ”میں نے قاتل کو دیکھا کہ وہ اپنی پٹی گھسیٹے جا رہا تھا۔“ [سنن ابي داود/كتاب الديات /حدیث: 4499]