سیدنا ابوموسیٰ اشعری رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: ”انگلیاں سب برابر ہیں۔ (ہر ایک کی دیت) دس دس اونٹ ہیں۔“ [سنن ابي داود/كتاب الديات /حدیث: 4556]

سیدنا (ابوموسیٰ اشعری) اشعری رضی اللہ عنہ نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”انگلیاں سب برابر ہیں۔“ (مسروق کہتے ہیں) میں نے کہا: ”دس دس اونٹ؟“ انہوں نے کہا: ”ہاں۔“ امام ابوداؤد رحمہ اللہ کہتے ہیں کہ یہ حدیث محمد بن جعفر نے شعبہ سے، اس نے غالب سے روایت کی تو کہا: ”میں نے مسروق بن اوس سے سنا۔“ اور اسماعیل نے روایت کی تو کہا: ”مجھے غالب التمار نے ابوولید کی سند سے بیان کی۔“ اور حنظلہ بن ابو صفیہ نے غالب سے اسماعیل کی سند سے بیان کی۔ [سنن ابي داود/كتاب الديات /حدیث: 4557]

سیدنا ابن عباس رضی اللہ عنہما سے روایت ہے، وہ کہتے ہیں کہ رسول اللہ صلی اللہ علیہ وسلم نے فرمایا: ”یہ اور یہ برابر ہیں۔“ یعنی انگوٹھا اور چھنگلیا۔ [سنن ابي داود/كتاب الديات /حدیث: 4558]

سیدنا عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”انگلیاں سب برابر ہیں، دانت سب برابر ہیں، آگے کے دو دانت اور ڈاڑھیں، یہ اور یہ سب برابر ہیں۔“ امام ابوداؤد رحمہ اللہ فرماتے ہیں کہ یہ روایت نضر بن شمیل نے شعبہ سے (مذکورہ بالا روایت) عبدالصمد کے ہم معنی بیان کی۔ امام ابوداؤد رحمہ اللہ نے کہا: ہمیں (ابوجعفر احمد بن سعید) دارمی نے نضر (نضر بن شمیل) سے یہ حدیث بیان کی۔ [سنن ابي داود/كتاب الديات /حدیث: 4559]

سیدنا ابن عباس رضی اللہ عنہ سے منقول ہے کہ رسول اللہ صلی اللہ علیہ وسلم نے فرمایا: ”دانت سب برابر ہیں اور انگلیاں (سب) برابر ہیں۔“ [سنن ابي داود/كتاب الديات /حدیث: 4560]

سیدنا ابن عباس رضی اللہ عنہما فرماتے ہیں کہ ”رسول اللہ صلی اللہ علیہ وسلم نے دونوں ہاتھ اور دونوں پاؤں کی انگلیاں، سب برابر قرار دی ہیں۔“ [سنن ابي داود/كتاب الديات /حدیث: 4561]

جناب عمرو بن شعیب اپنے والد سے اور وہ اپنے دادا رضی اللہ عنہ سے روایت کرتے ہیں کہ نبی کریم صلی اللہ علیہ وسلم نے اپنے خطبے میں ارشاد فرمایا جب کہ آپ صلی اللہ علیہ وسلم اپنی کمر کعبہ سے لگائے ہوئے تھے: ”انگلیوں میں دس دس اونٹ ہیں۔“ [سنن ابي داود/كتاب الديات /حدیث: 4562]