سیدنا ابوہریرہ رضی اللہ عنہ سے روایت ہے کہ کچھ صحابہ کرام آپ صلی اللہ علیہ وسلم کے پاس آئے اور کہنے لگے: ”اے اللہ کے رسول! ہم اپنے دلوں میں کچھ ایسے خیالات محسوس کرتے ہیں کہ ان کو زبان پر لانا بھی ہمارے لیے بڑا بھاری ہے، ہمیں یہ بھی گوارا نہیں کہ ہمیں دنیا کا مال ملے اور وہ ہم اپنی زبانوں پر لائیں۔“ آپ صلی اللہ علیہ وسلم نے فرمایا: ”کیا بھلا تم یہ کیفیت پاتے ہو؟“ انہوں نے کہا: ”ہاں۔“ آپ صلی اللہ علیہ وسلم نے فرمایا: ”یہ صریح ایمان ہے۔“ [سنن ابي داود/أبواب النوم /حدیث: 5111]

جناب ابوزمیل (سماک بن ولید حنفی) کہتے ہیں کہ میں نے سیدنا ابن عباس رضی اللہ عنہ سے سوال کیا: ”اس کیفیت کا کیا ہو جو میں اپنے سینے میں پاتا ہوں؟“ انہوں نے پوچھا: ”وہ کیا ہے؟“ میں نے کہا: ”اللہ کی قسم! میں اسے زبان پر نہیں لا سکتا۔“ انہوں نے کہا: ”کیا وہ شک شبہے والی بات ہے؟“ اور ہنس دیے اور بولے: ”اس سے کسی کو نجات نہیں۔“ حتیٰ کہ اللہ تعالیٰ نے یہ آیت اتاری: ﴿فَإِنْ كُنْتَ فِي شَكٍّ مِمَّا أَنْزَلْنَا إِلَيْكَ فَاسْأَلِ الَّذِينَ يَقْرَءُونَ الْكِتَابَ مِنْ قَبْلِكَ﴾ [سورة يونس: 94] ”اگر تمہیں اس چیز میں شک ہو جو ہم نے اتاری ہے تو ان لوگوں سے پوچھ لیجیے جو وہ کتاب پڑھتے ہیں جو تم سے پہلے اتاری گئی۔“ پھر انہوں نے مجھ سے کہا: ”جب تم اپنے جی میں کچھ محسوس کرو تو یہ پڑھا کرو: ﴿هُوَ الْأَوَّلُ وَالْآخِرُ وَالظَّاهِرُ وَالْبَاطِنُ وَهُوَ بِكُلِّ شَيْءٍ عَلِيمٌ﴾ [سورة الحديد: 3] ”وہ اللہ ہی سب سے اول ہے اور وہی سب سے آخر ہے۔ وہی ظاہر ہے اور وہی باطن ہے اور وہ ہر چیز سے خوب باخبر ہے۔“” [سنن ابي داود/أبواب النوم /حدیث: 5110]

سیدنا ابن عباس رضی اللہ عنہ سے مروی ہے کہ ایک آدمی نبی کریم صلی اللہ علیہ وسلم کی خدمت میں آیا اور کہنے لگا: ”اے اللہ کے رسول! ہمارے دل میں کچھ خیالات آتے ہیں“ اور وہ اشارے کنائے سے کچھ اس طرح کہہ رہا تھا کہ ان خیالات کو زبان پر لانے کی بجائے کوئلہ ہو جانا اسے زیادہ پسند ہے۔ تو رسول اللہ صلی اللہ علیہ وسلم نے فرمایا: ” «اللَّهُ أَكْبَرُ، اللَّهُ أَكْبَرُ، اللَّهُ أَكْبَرُ، الْحَمْدُ لِلَّهِ الَّذِي رَدَّ كَيْدَهُ إِلَى الْوَسْوَسَةِ» ”اللہ سب سے بڑا ہے، اللہ سب سے بڑا ہے، اللہ سب سے بڑا ہے، حمد اس اللہ کی جس نے اس (ابلیس) کے مکر کو وسوسے کی طرف لوٹا دیا۔“”ابن قدامہ نے «رَدَّ كَيْدَهُ» کی بجائے «رَدَّ أَمْرَهُ» کے لفظ کہے۔ [سنن ابي داود/أبواب النوم /حدیث: 5112]