حضرت خزیمہ بن جزء رضی اللہ عنہ سے روایت ہے، انہوں نے فرمایا: میں نے کہا: ”اے اللہ کے رسول صلی اللہ علیہ وسلم ! میں آپ صلی اللہ علیہ وسلم سے زمین کے چھوٹے (جنگلی) جانوروں کے بارے میں دریافت کرنے کے لیے حاضر ہوا ہوں۔ آپ صلی اللہ علیہ وسلم سانڈے کے بارے میں کیا فرماتے ہیں؟“ نبی صلی اللہ علیہ وسلم نے فرمایا: ”میں اسے نہیں کھاتا اور اسے حرام بھی قرار نہیں دیتا۔“ میں نے کہا: ”جس چیز کو آپ صلی اللہ علیہ وسلم حرام قرار نہیں دیتے، میں اسے کھا لوں گا۔ لیکن اے اللہ کے رسول صلی اللہ علیہ وسلم ! (آپ صلی اللہ علیہ وسلم ) کیوں (نہیں کھاتے؟)“ آپ صلی اللہ علیہ وسلم نے فرمایا: ”ایک قوم لاپتہ ہو گئی تھی اور مجھے ایسی (ظاہری) شکل و صورت نظر آئی جس سے مجھے شک ہوا (کہ شاید بنی اسرائیل کی مسخ شدہ قوم یہی ہو۔)“ میں نے کہا: ”اے اللہ کے رسول صلی اللہ علیہ وسلم ! آپ صلی اللہ علیہ وسلم خرگوش کے بارے میں کیا فرماتے ہیں؟“ نبی صلی اللہ علیہ وسلم نے فرمایا: ”میں اسے نہیں کھاتا اور اسے حرام بھی قرار نہیں دیتا۔“ میں نے کہا: ”جس چیز کو آپ صلی اللہ علیہ وسلم حرام قرار نہیں دیتے، میں اسے کھا لوں گا۔ لیکن اے اللہ کے رسول صلی اللہ علیہ وسلم ! (آپ صلی اللہ علیہ وسلم ) کیوں (نہیں کھاتے؟)“ آپ صلی اللہ علیہ وسلم نے فرمایا: ”مجھے بتایا گیا ہے کہ اسے خون (حیض) آتا ہے۔“ [سنن ابن ماجه/كتاب الصيد/حدیث: 3245]

حضرت خزیمہ بن جزء رضی اللہ عنہ سے روایت ہے، انہوں نے فرمایا: میں نے عرض کیا: ”اے اللہ کے رسول! میں آپ صلی اللہ علیہ وسلم سے زمین کے (جنگلی) جانوروں کے بارے میں سوال کرنے کے لیے حاضر ہوا ہوں۔ آپ لومڑی کے بارے میں کیا فرماتے ہیں؟“ نبی صلی اللہ علیہ وسلم نے فرمایا: ”لومڑی کون کھاتا ہے؟“ میں نے کہا: ”اے اللہ کے رسول صلی اللہ علیہ وسلم ! آپ بھیڑیے کے بارے میں کیا فرماتے ہیں؟“ آپ صلی اللہ علیہ وسلم نے فرمایا: ”کیا بھیڑیے کو کوئی ایسا شخص کھا سکتا ہے جس میں بھلائی موجود ہو؟“ [سنن ابن ماجه/كتاب الصيد/حدیث: 3235]

حضرت خزیمہ بن جزء رضی اللہ عنہ سے روایت ہے، انہوں نے فرمایا: ”میں نے عرض کیا: اے اللہ کے رسول! آپ لگڑ بگڑ کے بارے میں کیا فرماتے ہیں؟“ نبی صلی اللہ علیہ وسلم نے فرمایا: ”لگڑ بگڑ کو کون کھاتا ہے؟“ [سنن ابن ماجه/كتاب الصيد/حدیث: 3237]