حضرت عائشہ رضی اللہ عنہا سے مروی ہے کہ نبی اکرم صلی اللہ علیہ وسلم (اپنی ایک بیوی) حضرت زینب بنت جحش رضی اللہ عنہا کے ہاں زیادہ دیر ٹھہرے تھے کیونکہ آپ وہاں سے شہد پیتے تھے۔ میں نے اور حضرت حفصہ رضی اللہ عنہا نے آپس میں اتفاق کیا کہ ہم میں سے جس کے پاس نبی اکرم صلی اللہ علیہ وسلم تشریف لائیں تو وہ کہے کہ بلاشبہ میں آپ سے «مَغَافِير» ”مغافیر“ کی بو محسوس کر رہی ہوں، کیا آپ نے مغافیر (گوند) کھائی ہے؟ جب آپ صلی اللہ علیہ وسلم ہم میں سے کسی ایک کے ہاں تشریف لائے تو اس نے یہ لفظ کہہ دیے۔ آپ صلی اللہ علیہ وسلم نے فرمایا: ”نہیں، بلکہ میں نے تو زینب بنت جحش کے ہاں سے شہد پیا ہے، اب دوبارہ ہرگز نہیں پیوں گا۔“ تو پھر یہ آیات نازل ہوئیں: ﴿يَا أَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ﴾ [سورة التحريم: 1] ”اے نبی! آپ اس چیز کو کیوں حرام قرار دے رہے ہیں جسے اللہ تعالیٰ نے آپ کے لیے حلال قرار دیا ہے؟“ آگے حضرت عائشہ اور حفصہ رضی اللہ عنہما سے خطاب کرتے ہوئے فرمایا: ﴿إِنْ تَتُوبَا إِلَى اللَّهِ﴾ [سورة التحريم: 4] ”اگر تم اللہ تعالیٰ کے حضور (اپنی غلطی سے) توبہ کرو (تو تمہیں لائق ہے)۔“ جب نبی اکرم صلی اللہ علیہ وسلم نے اپنی ایک بیوی سے راز کی بات کہی، اس میں اشارہ ہے آپ صلی اللہ علیہ وسلم کے فرمان کی طرف کہ ”میں نے تو شہد پیا ہے، (آئندہ نہیں پیوں گا)۔“ [سنن نسائي/كتاب الأيمان والنذور/حدیث: 3826]

نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا سے روایت ہے کہ نبی صلی اللہ علیہ وسلم اپنی زوجہ محترمہ حضرت زینب رضی اللہ عنہا کے پاس (زیادہ دیر) ٹھہرتے اور ان کے پاس شہد پیتے تھے۔ میں نے اور حضرت حفصہ رضی اللہ عنہما نے آپس میں منصوبہ بنایا کہ نبی صلی اللہ علیہ وسلم ہم میں سے جس کے ہاں بھی تشریف لائیں وہ آپ سے کہے کہ ”میں آپ سے «الْمَغَافِيرِ» (مغافیر) کی بو پاتی ہوں۔“ آپ صلی اللہ علیہ وسلم ہم میں سے کسی کے پاس تشریف لائے تو اس نے آپ سے وہی بات کہہ دی۔ آپ صلی اللہ علیہ وسلم نے فرمایا: ”میں نے تو زینب کے ہاں سے شہد پیا ہے، دوبارہ نہیں پیوں گا۔“ پھر یہ آیت اتری: ﴿يَا أَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ﴾ [سورة التحريم: 1] ”اے نبی! آپ اس چیز کو کیوں حرام کرتے ہیں جسے اللہ تعالیٰ نے آپ کے لیے حلال کیا ہے؟“ (آگے آنے والے الفاظ) ﴿إِنْ تَتُوبَا إِلَى اللَّهِ﴾ [سورة التحريم: 4] میں حضرت عائشہ اور حضرت حفصہ رضی اللہ عنہما کی طرف اشارہ ہے اور ﴿وَإِذْ أَسَرَّ النَّبِيُّ إِلَى بَعْضِ أَزْوَاجِهِ حَدِيثًا﴾ [سورة التحريم: 3] میں بات سے مراد آپ صلی اللہ علیہ وسلم کا یہ فرمان ہے: ”میں نے شہد پیا ہے (دوبارہ نہیں پیوں گا)۔“ یہ ساری تفصیل عطاء کی حدیث میں ہے۔ [سنن نسائي/كتاب الأيمان والنذور/حدیث: 3450]

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم حضرت زینب بنت جحش رضی اللہ عنہا کے پاس (کچھ زیادہ دیر) ٹھہرتے تھے کہ ان کے پاس شہد پیتے تھے۔ میں نے اور حضرت حفصہ رضی اللہ عنہا نے منصوبہ بنایا کہ ہم میں سے جس کے پاس بھی رسول اللہ صلی اللہ علیہ وسلم تشریف لائیں وہ کہہ دے: میں آپ سے مغافیر کی بو پاتی ہوں۔ کیا آپ نے مغافیر کھایا ہے؟ پھر آپ صلی اللہ علیہ وسلم ان دونوں میں سے کسی کے گھر تشریف لے گئے تو اس نے یہی کچھ آپ سے کہہ دیا۔ آپ صلی اللہ علیہ وسلم نے فرمایا: ”نہیں، بلکہ میں نے زینب بنت جحش کے ہاں سے شہد پیا ہے، دوبارہ نہیں پیوں گا۔“ پھر آپ صلی اللہ علیہ وسلم پر یہ آیت اتری: ﴿يَا أَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ﴾ [سورة التحريم: 1] ”اے نبی! آپ اس چیز کو کیوں حرام کرتے ہیں جسے اللہ تعالیٰ نے آپ کے لیے حلال رکھا ہے۔“ آگے فرمایا: ﴿إِنْ تَتُوبَا إِلَى اللَّهِ﴾ [سورة التحريم: 4] ”اگر تم توبہ کرو... الخ۔“ اس سے عائشہ اور حفصہ رضی اللہ عنہما مراد ہیں۔ اور: ﴿وَإِذْ أَسَرَّ النَّبِيُّ إِلَى بَعْضِ أَزْوَاجِهِ حَدِيثًا﴾ [سورة التحريم: 3] ”جب نبی صلی اللہ علیہ وسلم نے ایک بیوی سے راز کی بات فرمائی۔“ اس سے مراد آپ صلی اللہ علیہ وسلم کا فرمان: ”بلکہ میں نے شہد پیا ہے... الخ“ ہے۔ [سنن نسائي/كتاب الأيمان والنذور/حدیث: 3410]