حضرت محمد بن صفوان رضی اللہ عنہ سے روایت ہے کہ انہوں نے دو خرگوش پکڑے لیکن ان کو ذبح کرنے کے لیے انہیں کوئی چھری وغیرہ نہ ملی تو انہوں نے ان کو ایک تیز دھار پتھر سے ذبح کر دیا، پھر وہ نبی اکرم صلی اللہ علیہ وسلم کے پاس حاضر ہوئے اور عرض کی: اے اللہ کے رسول! میں نے دو خرگوش شکار کیے تھے لیکن مجھے کوئی چھری وغیرہ نہیں ملی جس سے ذبح کرتا، تو میں نے ایک تیز دھار پتھر سے ان کو ذبح کر دیا، کیا میں ان کو کھا سکتا ہوں؟ آپ صلی اللہ علیہ وسلم نے فرمایا: ”ہاں، کھا لے۔“ [سنن نسائي/كتاب الضحايا/حدیث: 4404]

حضرت انس رضی اللہ عنہ سے مروی ہے کہ مقامِ مر الظہران میں ہم ایک خرگوش کے پیچھے بھاگے، میں نے اسے پکڑ لیا اور اسے لے کر حضرت ابو طلحہ رضی اللہ عنہ کے پاس آیا، انہوں نے اسے ذبح کیا، پھر اس کی چاروں ٹانگیں مجھے دے کر رسول اللہ صلی اللہ علیہ وسلم کی خدمت میں بھیجا، تو آپ صلی اللہ علیہ وسلم نے انہیں قبول فرما لیا۔ [سنن نسائي/كتاب الضحايا/حدیث: 4317]

حضرت ابن صفوان رضی اللہ عنہ سے روایت ہے کہ میں نے دو خرگوش شکار کیے لیکن مجھے کوئی ایسی چیز نہ مل سکی جس سے میں انہیں ذبح کر سکتا تو میں نے انہیں ایک تیز دھار پتھر سے ذبح کر دیا، پھر میں نے نبی اکرم صلی اللہ علیہ وسلم سے اس بارے میں پوچھا تو آپ نے مجھے ”ان کے کھانے کا حکم دیا“ (کھانے کی اجازت دی)۔ [سنن نسائي/كتاب الضحايا/حدیث: 4318]