ابراہیم بن عبدالرحمن بن عوف بیان کرتے ہیں: سیدنا عمر بن خطاب رضی اللہ عنہ نے سیدنا عبداللہ بن مسعود رضی اللہ عنہ، سیدنا ابومسعود انصاری رضی اللہ عنہ اور سیدنا ابودرداء رضی اللہ عنہ کی طرف پیغام بھیجا اور فرمایا: آپ لوگ نبی اکرم صلی اللہ علیہ وسلم کے حوالے سے بکثرت احادیث کیوں روایت کرتے ہیں؟ پھر سیدنا عمر رضی اللہ عنہ نے ان حضرات کو مدینہ منورہ میں روکے رکھا، یہاں تک کہ سیدنا عمر رضی اللہ عنہ نے جام شہادت نوش کر لیا۔
یہ روایت امام طبرانی نے معجم اوسط میں نقل کی ہے۔ (علامہ ہیثمی فرماتے ہیں:) میں یہ کہتا ہوں: یہ ”منقطع“ روایت ہے، ابراہیم نامی راوی بیس ہجری میں پیدا ہوئے تھے، انہیں سیدنا عمر رضی اللہ عنہ کی زندگی کے صرف تین سال ملے تھے اور سیدنا عبداللہ بن مسعود رضی اللہ عنہ کوفہ میں رہے ہیں، تو یہ روایت سیدنا عمر رضی اللہ عنہ سے مستند طور پر منقول نہیں ہے، میں یہ کہتا ہوں: بعض احادیث کے بارے میں تحقیق کرنے سے متعلق باب آگے آئے گا۔ [مجمع الزاوئد ومنبع الفوائد/كِتَابُ الْعِلْمِ/حدیث: 666]