سیدنا عتبان رضی اللہ عنہ، راوی کو شک ہے، یا شاید یہ لفظ ہے: سیدنا ابن عتبان انصاری رضی اللہ عنہ بیان کرتے ہیں: میں نے عرض کی: یا رسول اللہ! میں اپنی بیوی کے ساتھ تھا، جب میں نے آپ صلی اللہ علیہ وسلم کی آواز سنی، تو الگ ہوا، اور غسل کیا، تو نبی اکرم صلی اللہ علیہ وسلم نے ارشاد فرمایا: پانی، صرف پانی سے لازم ہوتا ہے۔
یہ روایت امام أحمد نے نقل کی ہے اور اس کی سند حسن ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1431]

سیدنا رافع بن خدیج رضی اللہ عنہ بیان کرتے ہیں: نبی اکرم صلی اللہ علیہ وسلم نے مجھے بلند آواز میں پکارا، میں اُس وقت اپنی بیوی کے ساتھ وظیفہ زوجیت ادا کر رہا تھا، ابھی مجھے انزال نہیں ہوا تھا، میں اُٹھا میں نے غسل کیا، (بعد میں) میں نے آپ صلی اللہ علیہ وسلم کو بتایا کہ جب آپ نے مجھے بلایا تھا، اُس وقت میں اپنی بیوی کے ساتھ وظیفہ زوجیت ادا کر رہا تھا اور ابھی مجھے انزال نہیں ہوا تھا، میں نے غسل کر لیا، تو نبی اکرم صلی اللہ علیہ وسلم نے ارشاد فرمایا: یہ تم پر لازم نہیں تھا، پانی، پانی کی وجہ سے لازم ہوتا ہے۔
یہ روایت امام أحمد نے اور امام طبرانی نے معجم کبیر میں نقل کی ہے، اس کی سند میں ایک راوی رشدین بن سعد ہے اور وہ ضعیف ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1432]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم انصار سے تعلق رکھنے والے ایک شخص کے دروازے پر تشریف لائے، آپ صلی اللہ علیہ وسلم نے سلام کیا، وہ شخص اُس وقت اپنی بیوی کے قریب تھا، اُس نے بیوی کی قربت میں آپ کو سلام کا جواب دیا، نبی اکرم صلی اللہ علیہ وسلم نے دوسری مرتبہ سلام کیا، تو اُس شخص نے (سلام کا) جواب دے دیا، لیکن اُٹھا نہیں، جب نبی اکرم صلی اللہ علیہ وسلم کو اندر آنے کا نہیں کہا: گیا، تو آپ صلی اللہ علیہ وسلم واپس تشریف لے گئے، وہ شخص فارغ ہونے سے پہلے اُٹھا اور نبی اکرم صلی اللہ علیہ وسلم کو تلاش کرتا ہوا آپ کے پیچھے آیا، سیدنا ابوہریرہ رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کی خدمت میں حاضر ہوئے، تو وہ کھڑا ہوا تھا، ہم اس کے پاس اکٹھے ہو گئے، اس نے اپنے گھر کے پاس موجود ایک ندی میں غسل کیا تھا، جب وہ آیا تو وہ غسل کر چکا تھا، نبی اکرم صلی اللہ علیہ وسلم نے ارشاد فرمایا: اس نے غسل کر لیا ہے، حالانکہ اس پر غسل واجب نہیں ہوا ہے، وہ شخص نبی اکرم صلی اللہ علیہ وسلم کی خدمت میں معذرت کرنے کے لیے آیا، اس نے آپ کو اپنی صورت حال کے بارے میں بتایا، تو نبی اکرم صلی اللہ علیہ وسلم نے ارشاد فرمایا: تم نے غسل کر لیا، حالانکہ تم پر غسل واجب نہیں تھا۔
یہ روایت امام طبرانی نے معجم اوسط میں نقل کی ہے، امام بزار نے سیدنا ابوہریرہ رضی اللہ عنہ کے حوالے سے یہ الفاظ نقل کئے ہیں: ”جب کوئی شخص اپنی بیوی کے ساتھ قربت کرے، اور اُسے انزال نہ ہو، تو غسل لازم نہیں ہو گا“ امام بزار کے رجال ”صحیح“ کے رجال ہیں، امام طبرانی کے رجال کی توثیق کی گئی ہے، صرف امام طبرانی کے استاد محمد بن شعیب کا معاملہ مختلف ہے، میں اُن سے واقف نہیں ہوں۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1433]

سیدنا عبدالرحمن بن عوف رضی اللہ عنہ بیان کرتے ہیں: نبی اکرم صلی اللہ علیہ وسلم ایک انصاری شخص کو طلب کرنے کے لیے تشریف لے گئے، آپ صلی اللہ علیہ وسلم نے اُسے بلایا، جب وہ انصاری گھر سے باہر آیا، تو اُس کے سر سے پانی کے قطرے ٹپک رہے تھے، نبی اکرم صلی اللہ علیہ وسلم نے دریافت کیا: تمہارے سر کو کیا ہوا ہے؟ اس نے عرض کی: جب آپ نے مجھے بلایا تھا، اس وقت میں اپنی بیوی کے ساتھ تھا، مجھے یہ اندیشہ ہوا کہ کہیں میری وجہ سے آپ کو انتظار نہ کرنا پڑے، میں جلدی سے اُٹھا میں نے اپنے اوپر پانی بہایا اور باہر آ گیا، نبی اکرم صلی اللہ علیہ وسلم نے دریافت کیا: کیا تمہیں انزال ہو گیا تھا؟ اُس نے جواب دیا: جی نہیں! نبی اکرم صلی اللہ علیہ وسلم نے فرمایا: جب تم اس طرح کرو، تو غسل ہرگز نہ کرو، عورت کا جو مواد تمہیں لگ جاتا ہے، اُس کو دھو لو، اور پھر نماز کے وضو کی طرح وضو کر لو، کیونکہ پانی، پانی کی وجہ سے لازم ہوتا ہے۔
یہ روایت امام ابویعلیٰ اور امام بزار نے زید بن سعد کے حوالے سے، ابوسلمہ بن عبدالرحمن بن عوف کے حوالے سے، اُن کے والد سے نقل کی ہے، ابوسلمہ نے اپنے والد سے سماع نہیں کیا ہے، اور زید نامی راوی کے حالات بیان کرتے ہوئے، میں نے کسی کو نہیں پایا ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1434]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے انصار سے تعلق رکھنے والے ایک شخص کو بلوایا، اسے آنے میں تاخیر ہو گئی، نبی اکرم صلی اللہ علیہ وسلم نے دریافت کیا: کس چیز نے تمہیں روک لیا تھا؟ اس نے بتایا: جب آپ کا پیغام رساں میرے پاس آیا، میں اس وقت اپنی بیوی کے قریب تھا، میں اُٹھا میں نے غسل کیا، نبی اکرم صلی اللہ علیہ وسلم نے ارشاد فرمایا: تم پر کوئی حرج نہیں ہونا تھا، اگر تم غسل نہ بھی کرتے، جب کہ تمہیں انزال نہ ہوا ہو۔ راوی بیان کرتے ہیں: تو انصار ایسا ہی کرتے ہیں۔
یہ روایت امام ابویعلیٰ اور امام بزار نے نقل کی ہے، اس کی سند میں ایک راوی ابوسعد بقال ہے اور وہ ضعیف ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1435]

سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے انصار سے تعلق رکھنے والے ایک شخص کو بلایا، اسے آنے میں تاخیر ہو گئی، پھر وہ باہر آیا اور اس نے کلام (یعنی تاخیر کی وجہ کو) ذکر کیا، تو نبی اکرم صلی اللہ علیہ وسلم نے ارشاد فرمایا: جب کسی شخص کو انزال نہ ہوا ہو، تو اس پر غسل (لازم) نہیں ہو گا، یہاں ایک لفظ کے بارے میں راوی کو شک ہے،
یہ روایت امام بزار نے نقل کی ہے، اس کے رجال ثقہ ہیں، صرف ابواسرائیل ملائی کا معاملہ مختلف ہے، وہ اپنے حافظے کی خرابی کی وجہ سے ضعیف ہے، بعض حضرات نے اسے ”ثقہ“ قرار دیا ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1436]

عبید بن رفاعہ، اپنے والد کا یہ بیان نقل کرتے ہیں: نبی اکرم صلی اللہ علیہ وسلم کے زمانہ اقدس میں ہم ایسا کیا کرتے تھے، کہ جب ہمیں انزال نہیں ہوتا تھا، تو ہم غسل بھی نہیں کرتے تھے۔
یہ روایت امام بزار نے اور امام طبرانی نے معجم کبیر میں نقل کی ہے اس کے رجال ”صحیح“ کے رجال ہیں، صرف ابن اسحاق کا معاملہ مختلف ہے، وہ ثقہ ہے، لیکن تدلیس کرتا ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1437]

سیدنا رافع بن خدیج رضی اللہ عنہ کے صاحبزادے کے حوالے سے، سیدنا رافع بن خدیج رضی اللہ عنہ کا یہ بیان منقول ہے: نبی اکرم صلی اللہ علیہ وسلم نے مجھے بلایا میں اُس وقت اپنی بیوی کے قریب تھا، میں اُٹھ گیا، ابھی مجھے انزال نہیں ہوا تھا، میں نے غسل کیا، اور نبی اکرم صلی اللہ علیہ وسلم کی خدمت میں حاضر ہو گیا، میں نے آپ کو بتایا کہ جب آپ نے مجھے بلایا تھا، اُس وقت میں اپنی بیوی کے قریب تھا، میں اُٹھ گیا، ابھی مجھے انزال نہیں ہوا تھا، اور میں نے غسل کر لیا، نبی اکرم صلی اللہ علیہ وسلم نے ارشاد فرمایا: تم پر کوئی گناہ نہیں ہونا تھا، کیونکہ پانی، پانی کی وجہ سے لازم ہوتا ہے۔ سیدنا رافع رضی اللہ عنہ بیان کرتے ہیں: بعد میں نبی اکرم صلی اللہ علیہ وسلم نے ہمیں ایسی صورتحال میں غسل کرنے کا حکم دیا۔
یہ روایت امام أحمد نے اور امام طبرانی نے معجم اوسط میں نقل کی ہے، وہ فرماتے ہیں: یہ سہل بن رافع کے حوالے سے، اُن کے والد سے منقول ہے، اس کی سند میں ایک راوی رشدین بن سعد ہے اور وہ خراب حافظے کا مالک ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1438]

سیدنا رفاعہ بن رافع رضی اللہ عنہ، جنہیں بیعت عقبہ اور غزوہ بدر میں شرکت کا شرف حاصل ہے، وہ بیان کرتے ہیں: سیدنا عمر رضی اللہ عنہ کے پاس موجود تھا، جب انہیں یہ بتایا گیا سیدنا زید بن ثابت رضی اللہ عنہ مسجد میں لوگوں کو یہ فتوی دیتے ہیں، جو اُن کی اپنی رائے کی بنیاد پر ہے کہ جو شخص صحبت کرے اور اسے انزال نہ ہو، تو اس پر غسل لازم نہیں ہوتا، سیدنا عمر رضی اللہ عنہ نے کہا: اسے جلدی سے میرے پاس لاؤ، انہیں لایا گیا، تو سیدنا عمر رضی اللہ عنہ نے فرمایا: اے اپنی جان کے دشمن! مجھے یہ پتہ چلا ہے کہ تم اللہ کے رسول کی مسجد میں، اپنی رائے کی بنیاد پر لوگوں کو فتوی دیتے ہو؟ انہوں نے کہا: میں نے ایسا نہیں کیا، میرے چچاؤں نے، اللہ کے رسول صلی اللہ علیہ وسلم کے حوالے سے مجھے حدیث بیان کی ہے سیدنا عمر رضی اللہ عنہ دریافت کیا: تمہارے کون سے چچا نے؟ انہوں نے جواب دیا: سیدنا ابی بن کعب رضی اللہ عنہ، سیدنا ابوایوب انصاری رضی اللہ عنہ اور سیدنا رفاعہ بن رافع رضی اللہ عنہ، تو سیدنا عمر رضی اللہ عنہ میری طرف متوجہ ہوئے اور بولے: یہ لڑکا کیا کہہ رہا ہے؟ میں نے کہا: نبی اکرم صلی اللہ علیہ وسلم کے زمانہ اقدس میں ہم ایسا کیا کرتے تھے، سیدنا عمر رضی اللہ عنہ نے دریافت کیا: تم لوگوں نے اللہ کے رسول صلی اللہ علیہ وسلم سے اس بارے میں دریافت کیا تھا؟ تو سیدنا رفاعہ رضی اللہ عنہ نے یہی کہا: کہ نبی اکرم صلی اللہ علیہ وسلم کے زمانہ اقدس میں ہم یہ کیا کرتے تھے۔ راوی بیان کرتے ہیں: سیدنا عمر رضی اللہ عنہ نے لوگوں کو اکٹھا کیا، تو لوگوں کو اس بات پر اتفاق تھا کہ غسل صرف منی کے خروج کی وجہ سے لازم ہوتا ہے، صرف سیدنا علی بن ابوطالب رضی اللہ عنہ اور سیدنا معاذ بن جبل رضی اللہ عنہ کا معاملہ مختلف تھا، ان دونوں حضرات کا یہ کہنا تھا: کہ جب شرمگاہ، شرمگاہ سے مل جائے، تو غسل واجب ہو جاتا ہے، راوی بیان کرتے ہیں: سیدنا علی رضی اللہ عنہ نے فرمایا: امیر المؤمنین! اس مسئلے کے بارے میں سب سے زیادہ علم، نبی اکرم صلی اللہ علیہ وسلم کی ازواج کے پاس ہو گا، سیدنا عمر رضی اللہ عنہ نے سیدہ حفصہ رضی اللہ عنہا کو پیغام بھیجا، تو انہوں نے فرمایا: مجھے اس بارے میں علم نہیں ہے، سیدنا عمر رضی اللہ عنہ نے سیدہ عائشہ رضی اللہ عنہا کو پیغام بھیجا، تو انہوں نے فرمایا: جب شرمگاہ، شرمگاہ سے مل جائے، تو غسل واجب ہو جائے گا، تو سیدنا عمر رضی اللہ عنہ نے غصے کا اظہار کیا، اور ارشاد فرمایا: اب اگر مجھے کسی کے بارے میں یہ پتہ چلا کہ اُس نے ایسا کیا ہے، تو میں اُسے سزا دوں گا۔
یہ روایت امام أحمد نے، اور امام طبرانی نے معجم کبیر میں نقل کی ہے، امام أحمد کے رجال ثقہ ہیں، صرف یہ ہے کہ ابن اسحاق نامی راوی تدلیس کرنے والا ہے، ویسے وہ ثقہ ہے ”صحیح“ میں اس روایت کا ایک حصہ منقول ہے، امام طبرانی نے معجم کبیر میں یہ الفاظ نقل کیے ہیں: پھر ان لوگوں نے غزل کے بارے میں گفتگو شروع کی، تو ان کا یہ کہنا تھا کہ اس میں کوئی حرج نہیں ہے، ایک شخص نے سرگوشی میں اپنے ساتھی کے ساتھ کوئی بات چیت کی، تو انہوں نے دریافت کیا: یہ سرگوشی میں کیا بات ہو رہی ہے؟ ان دونوں میں سے ایک نے کہا: یہ کہہ رہا ہے: یہ تو چھوٹی قسم کا زندہ درگور کرنا ہے تو سیدنا علی رضی اللہ عنہ نے ارشاد فرمایا: زندہ درگور کرنا، یہ اس وقت تک نہیں ہو سکتا جب تک اُس پر سات مراحل نہیں گزر جاتے۔ اللہ تعالیٰ نے ارشاد فرمایا ہے: ”اور ہم نے انسان کو مٹی کے خلاصہ سے تخلیق کیا، پھر ہم نے اسے ایک مضبوط جگہ پر نطفہ کی شکل میں رکھ دیا“۔ یہ آیت یہاں تک ہے۔ تو اللہ تعالیٰ کی ذات برکت والی ہے جو سب سے بہترین خالق ہے“۔ راوی بیان کرتے ہیں: تو سب لوگ سیدنا علی بن ابوطالب رضی اللہ عنہ کے فتوی کے مطابق قائل ہو کر منتشر ہوئے، کہ اس (یعنی عزل کرنے) میں کوئی حرج نہیں ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1439]

سیدنا معاذ بن جبل رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جب شرمگاه، شرمگاہ سے مل جائے، تو غسل واجب ہو جاتا ہے“۔ یہ روایات امام بزار نے نقل کی ہیں، اس کی سند میں ایک راوی ابوبکر بن ابومریم ہے اور وہ ضعیف ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1440]