سیدنا عبداللہ بن حنظلہ رضی اللہ عنہ بیان کرتے ہیں: ایک شخص نے نبی اکرم صلی اللہ علیہ وسلم کو سلام کیا، نبی اکرم صلی اللہ علیہ وسلم نے تھوڑی دیر پہلے پیشاب کیا تھا، نبی اکرم صلی اللہ علیہ وسلم نے اُسے کوئی جواب نہیں دیا، یہاں تک کہ آپ نے دیوار پر ہاتھ پھیرا، یعنی تیمم کیا اور پھر اُس کے سلام کا جواب دیا)۔
یہ روایت امام أحمد نے نقل کی ہے، اس کی سند میں ایک راوی ایسا ہے جس کا نام بیان نہیں کیا گیا ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1504]

سیدنا براء بن عازب رضی اللہ عنہ بیان کرتے ہیں: اُنہوں نے نبی اکرم صلی اللہ علیہ وسلم کو سلام کیا، آپ اُس وقت پیشاب کر رہے تھے، نبی اکرم صلی اللہ علیہ وسلم نے انہیں سلام کا جواب اُس وقت تک نہیں دیا، جب تک آپ فارغ نہیں ہو گئے۔
یہ روایت امام طبرانی نے معجم اوسط میں نقل کی ہے، اس کی سند میں ایک ایسا راوی ہے، جس سے میں واقف نہیں ہوں۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1505]

سیدنا جابر بن سمرہ رضی اللہ عنہ بیان کرتے ہیں: میں نبی اکرم صلی اللہ علیہ وسلم کی خدمت میں حاضر ہوا، آپ اُس وقت پیشاب کر رہے تھے، میں نے آپ کو سلام کیا، آپ نے مجھے جواب نہیں دیا، پھر آپ گھر میں تشریف لے گئے، آپ نے وضو کیا، پھر باہر تشریف لائے اور فرمایا: وعلیکم السلام!
یہ روایت امام طبرانی نے معجم اوسط اور معجم کبیر میں نقل کی ہے، وہ فرماتے ہیں: فضل بن ابوحسان اسے نقل کرنے میں منفرد ہے (علامہ ہیثمی فرماتے ہیں:) میں یہ کہتا ہوں: میں نے کسی کو اس کا ذکر کرتے ہوئے نہیں پایا ہے۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1506]

ابوسلام بیان کرتے ہیں: مجھے اُس شخص نے یہ بات بتائی ہے: جس نے نبی اکرم صلی اللہ علیہ وسلم کو دیکھا، کہ آپ نے پیشاب کیا اور پھر پانی استعمال کرنے سے پہلے (یعنی وضو کرنے سے پہلے) آپ نے قرآن کی کچھ آیات کی تلاوت کی، (یہاں ہشیم نامی راوی نے ایک لفظ مختلف نقل کیا ہے)۔
یہ روایت امام أحمد نے نقل کی ہے اور اس کے رجال ثقہ ہیں۔ [مجمع الزاوئد ومنبع الفوائد/كِتَابُ الطَّهَارَةِ/حدیث: 1507]