سیدنا جابر رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”تم پر کنواری عورتوں سے شادی کرنا لازم ہے، کیونکہ ان کے رحم میں بچہ پیدا کرنے کی صلاحیت زیادہ ہوتی ہے، ان کے منہ زیادہ میٹھے ہوتے ہیں اور خواہشات کم ہوتی ہیں، اور یہ تھوڑے پر راضی ہو جاتی ہیں“۔
یہ روایت امام طبرانی نے معجم اوسط میں نقل کی ہے اس کی سند میں ایک راوی محمد بن کنیز سقاء ہے اور وہ متروک ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7345]

سیدنا عبداللہ بن مسعود رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”کنواری عورتوں کے ساتھ شادی کرو، کیونکہ ان کے منہ میٹھے ہوتے ہیں، رحم میں بچہ پیدا کرنے کی صلاحیت زیادہ ہوتی ہے اور یہ تھوڑے سے راضی ہو جاتی ہیں“۔
یہ روایت امام طبرانی نے نقل کی ہے، اس کی سند میں ایک راوی ابوبلال اشعری ہے، جسے امام دارقطنی رحمہ اللہ نے ضعیف قرار دیا ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7346]

سیدنا کعب بن عجرہ رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے پاس موجود تھے، آپ نے فرمایا: اے فلاں! کیا تم نے شادی کر لی ہے؟ انہوں نے عرض کی: جی نہیں! نبی اکرم صلی اللہ علیہ وسلم نے مجھ سے دریافت کیا: کیا تم نے شادی کر لی ہے؟ میں نے عرض کی: جی ہاں! نبی اکرم صلی اللہ علیہ وسلم نے دریافت کیا: کنواری کے ساتھ یا ثیبہ کے ساتھ؟ میں نے عرض کی: جی نہیں! بلکہ ثیبہ کے ساتھ، نبی اکرم صلی اللہ علیہ وسلم نے فرمایا: کنواری کے ساتھ کیوں نہیں؟ کہ تم اس کو کاٹتے اور وہ تمہیں کاٹتی۔
یہ روایت امام طبرانی نے ربیع بن کعب بن عجرہ کے حوالے سے اُن کے والد سے نقل کی ہے، میں نے کسی کو ربیع کے حالات بیان کرتے ہوئے نہیں پایا ہے، اس روایت کے بقیہ رجال ثقہ ہیں اس کے بعض راویوں میں ضعف پایا جاتا ہے، ابن حبان نے ان راویوں کو ثقہ قرار دیا ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7347]

سیده سہلہ بنت عاصم بن عدی رضی اللہ عنہا بیان کرتی ہیں: غزوہ حنین کے موقع پر میں پیدا ہوئی تھی، جب نبی اکرم صلی اللہ علیہ وسلم نے حنین کو فتح کیا تھا، نبی اکرم صلی اللہ علیہ وسلم نے میرا نام سہلہ رکھا تھا اور یہ فرمایا تھا: اللہ تعالیٰ تمہارے معاملے کو آسان کرے گا، نبی اکرم صلی اللہ علیہ وسلم نے میرا حصہ بھی مقرر کیا تھا اور جس دن میں پیدا ہوئی تھی، اُس دن میری شادی سیدنا عبدالرحمن بن عوف رضی اللہ عنہ کے ساتھ کروا دی تھی۔
یہ روایت امام طبرانی نے نقل کی ہے، اس کی سند میں ایک راوی عبدالعزیز بن عمران ہے اور وہ متروک ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7348]